Белгісіз дерт: Астанада 11 жастағы қыздың тамағына шаш өскен

Астанада 11 жасар оқушының ауыз қуысында түк өсе бастады. Анасы Ақмарал Шалабаева дереу дәрігерлерге жүгінген, алайда мамандардың өзі ерекше ауруға аң-таң болып отыр, деп хабарлайды janabastau.kz.

Қыздың анасы Ақмарал Шалабаеваның айтуынша, 2024 жылдың наурызына дейін қызды еш ауру мазаламаған, әдеттен тыс ештеңе байқамаған. Тіпті наурыз айының басында олар тіс дәрігеріне барған және емдеу кезінде ешқандай ауытқу болмаған.

"15 наурызда қызым тамағының ауырғанын айта бастады. Мен оны ЖРВИ немесе ангина шығар деп ойладым. Тамағын тексерейін деп қарағанымда қатты таң қалдым. Бадамша бездерінде екі жағынан және тістерінің арасынан шаш өсіп тұрғанын көрдім", – дейді қыздың анасы. 

Олар дереу дәрігерлерге хабарласып, жедел жәрдем шақырған.

"Дәрігерлер де бұл құбылысқа таң қалды, дегенмен барлық түкті пинцетпен алып тастады", – дейді Ақмарал.

Астана қалалық денсаулық сақтау басқармасы науқасқа оториноларинголог, эндокринолог және басқа да бейінді мамандардың тексерулері өткізілгенін атап өтті. Дәрігерлер мұндай құбылыстың пайда болу себептерін түсіндіре алмай отыр.

"Қазір нақты диагноз жоқ, оны анықтағаннан кейін дәрігерлер мен білікті мамандардың көмегімен шешім қабылдаймыз. Барлық көмекке немесе кәсіби кеңес алуға дайынбыз", – дейді қыздың анасы. 

Алдағы уақытта қызға компьютерлік томография және жатыр мойны мен шап аймағының магнитті-резонанстық томографиясы жасалады, содан кейін дәрігерлер емдеу жолдарын бекітеді.

“Бұл құбылыстың бүкіл әлемде атауы жоқ. Мұндай диагноз жоқ. Сондықтан әзірге бұл мәселе бойынша нақты шешім немесе ұсыныс жоқ", – деді қоғамдық денсаулық сақтау департаментінің баспасөз хатшысы Айжан Ақай.