Әлемде инфляция деңгейі өсті

Әлемде инфляция деңгейінің артуы экономикалық дағдарысты жиілетті. Қазір Еуропада ақшаның құнсызданғаны соншалық, тарихи деңгейдегі өзгерістер болып жатыр. Die Welt басылымы «инфляция Еуропалық Одақтың экономикалық жүйесін күйретті», – дейді. Өткен аптада Еуропалық Орталық банк соңғы 11 жылда алғаш рет базалық пайыздық мөлшерлемені 0-ден 0,5%-ға көтерген болатын. Осылайша банк еуроаймақтағы 8%-дан асып кеткен рекордты инфляцияны тежеуге қадам жасады. Бұл өзгеріске Украинадағы соғыстан туындаған дағдарыс, Италия үкіметіндегі шиеленіс те кері әсер етіп отыр. Инфляция деңгейі тек Еуропа емес, әлемнің түкпір-түкпірінде өсті. Халықаралық валюта қоры сарапшыларының пікірінше, бұған сұраныс пен ұсыныс тепе-теңсіздігі, азық-түлік, энергия ресурстарының қымбаттауы ықпал еткен. Сондықтан биыл әлем елдеріндегі инфляция болжамы қайта қарастырылған. Гипотеза бойынша дамыған елдерде инфляция деңгейі 6,6, ал дамушы елдерде 9,5%-ға жетуі мүмкін. Бұл алдыңғы болжамға қарағанда шамамен 1% жоғары. «Ресей басқыншылығы мен Қытайдағы індетке қарсы шектеулер және әлем елдеріндегі ақша-несие саясатының қатаңдатуынан алдағы айларда дүние жүзі экономикасы құлдырайды» деген пессимистік болжам да бар.