Еуропа әскері Украинаға кірсе, ҰҚШҰ не істейді? Тасмағамбетов жауап берді

ҰҚШҰ бас хатшысы Иманғали Тасмағамбетов Известия басылымына берген сұхбатында Еуропа әскерінің Украинаға кіру ықтималдығына байланысты сұраққа жауап берді, деп хабарлайды janabastau.kz.

Еуропада Украинаға әскери контингенттерді орналастыру мәселесі қарастырылып жатыр. Бұл өңірлік қауіпсіздікке қалай әсер етеді? ҰҚШҰ қандай шаралар қабылдауы мүмкін?

ҰҚШҰ Бас хатшысы Иманғали Тасмағамбетов бұл мәселеге қатысты өз пікірін білдірді. Ол Еуропа елдерінің әскери контингенттер жіберу туралы бірнеше рет талқылағанын, бірақ әзірге ресми шешім қабылданбағанын атап өтті.

"Бұл – өңірлік тұрақтылыққа үлкен қатер төндіруі мүмкін. Еуропалық қоғам экономикалық және әлеуметтік қиындықтарға тап болып отырғандықтан, мұндай шешімді қолдау екіталай. Себебі бұл қоғам үшін қосымша ауыртпалық болмақ, тіпті контингенттер шабуылдау операцияларына тартылмай, тек полиция немесе бақылау функцияларын орындаса да," – деді Тасмағамбетов.

Егер жағдай ушығып, қауіп күшейсе, ҰҚШҰ өз жарғылық құжаттарына сәйкес, мүше мемлекеттердің ортақ шешімімен көмек көрсетуге дайын екенін мәлімдеді.

Еуропаның реакциясы

Еуропа көшбасшылары Киевке қару-жарақ жеткізуді жалғастыру қажеттігін баса айтты. Дегенмен сарапшылар Еуропаның әскери қуатын толықтыру қабілетіне күмәнмен қарап, Украина қақтығысты қаншалықты ұзақ жалғастыра алатынына алаңдаулы.

Геосаяси шиеленіс күшейген сайын, 960 шақырымдық майдан шебінде украин және ресейлік күштер арасындағы қарулы қақтығыс жалғасуда. Донецктің батысындағы Покровск маңында Украина қарулы күштері ресейлік әскердің шабуылына қарсы тұрды.

Бұл арада АҚШ тарапы Украинаға әскери көмекті тоқтату туралы шешім қабылдағанын хабарлады. Трамп әкімшілігі бұл әрекетті қақтығысты бейбіт жолмен шешудің алғышарты ретінде сипаттады.

Осы жағдай халықаралық қауіпсіздікке қалай әсер етеді? Пікіріңізді қалдырыңыз!