ІЗГІЛІК АЙЫ – РАМАЗАН ҚҰТТЫ БОЛСЫН!

ІЗГІЛІК АЙЫ – РАМАЗАН ҚҰТТЫ БОЛСЫН! 23 наурыз Рамазан айының бірінші күні!

Мейірімді, рахымды Алланың атымен бастаймын!

Тәуелсіздігімізбен қатар елімізде Ислам дінін қайта жаңғыртқан Алла Тағалаға мың сан шүкір! Қазіргі уақытта дініміз бен дәстүрімізді қатар алып жүретін дәрежеге жеттік. Жыл сайын дәстүрлі мерекелермен қатар, діни мерекелерді де жоғары дәрежеде атап өтудеміз. Құрметті мұсылман қауым! Барлықтарыңызды қасиетті Рамазан айының келуімен шын жүректен құттықтап, Алла Тағаладан ел амандығын, жұрт тыныштығын, дінімізге қуат, отбастарыңызға береке мен бірлік, барша мұсылман халықтарына Жаратқанның жақсылықтары дарысын деп тілеймін. Рамазан айында барша мұсылман ораза ұстап, Алла Тағаланың мейір-шапағатына бөленеді, қайырлы iстердi көбейтедi, жүрегiн, тiлiн және барша iс-әрекетiн Аллаға ұнамды істерге бейімдейді. Рамазан – он екі айдың сұлтаны, кешірімі мол ай. Күнделікті тіршілік қамымен жүретін пенденің жүрегіне бұл айда иман нұры құйылады. Рамазан – Алланың мейірімі төгіліп, жұмақтың есігі айқара ашылатын, иманды күшейтуге мүмкіндік берілген берекелі ай. Бұл айда мұсылмандар ораза ғибадатын атқарудың нәтижесінде шүкіршілік, шыдамдылық, жанашырлық, сабырлылық, қайырымдылық, мейірімділік, бауырмалдық секiлдi iзгi қасиеттердi тұла бойларына қалыптастырып, имандылықтары артады. Имандылық адамды арсыздықтан арылтады. Хадис шәріпте: «Адамдарды жәннатқа кіргізетін нәрсе тақуалық пен көркем мінезділік», – делінген. Ораза адамды имандылықтың жемісі тақуалыққа тәрбиелейді. Адам шынайы тақуалықты рамазан айында сезінеді. Осы хадисте баяндалғандай, тақуалы адам жәннатқа лайықты. Жаннат адамының келесі сипаты – көркем мінезділік. Көркем мінезділік нәпсіні тізгіндеуден, тақуалықтан туындайды. Өзін-өзі басқаруы күшті, нәпсісі тәрбиеленген адамның мінез-құлқы жақсы болады. Ондай адам зұлымдық, жамандық жасамайды, басқаға хасад (көре алмаушылық) қылмайды. Ардақты пайғамбарымыз Мұхаммед (c.а.с.): «Кiм Рамазан айының оразасын шын иман және ықыласпен ұстаса, оның бұрын iстелген күнәлары кешiрiледi», - деген. «Ораза» арабтың «сиям» деген сөзінен аударылады. «Өзін тыю» деген мағынаны білдіреді. Шариғи терминде «Алла Тағаланың разылығы үшін таң атқаннан күн толық ұясына батқанға дейін ішіп-жеу- ден және жыныстық қатынастан тыйылу» - деген сөз. Ораза адамның рухани жан-дүниесін кемелдендіріп, ой-санасын тазалап, нәпсілік қалауларын тізгіндеуге және Жаратушымен байланысын арттыруға жол ашатын ғибадат. Қорыта айтқанда, Рамазан айында шынайы құлшылықпен, ораза әдебін сақтай отырып әр күнімізді өткізсек, сонда ғана мінезіміз көркем, иманымыз кемелдене түспек. Рамазан айында ораза ғибадатын шынайы ықыласымызбен ұстауды Алла бәрімізге нәсіп етсін. Алла Тағала хадис құдсиде: «Адамзаттың барлық амалы өзі үшін, ал, ұстаған оразасы Мен үшін, оның сауабын Өзім ғана (білемін және) беремін. Өйткені, ол Менің ризалығым үшін таң атқаннан күн батқанға дейін тағамнан, сусын, ішімдігінен және жыныстық қатынастан бас тартты», – дегеніндей рамазан айында күні бойы қарны ашса да ештеңе жемей, шөлдесе де бір жұтым су ішпей, шыдамдылық танытқан мұсылман қауымға Алла Тағаланың нұры жаусын.

Құрметті жерлестер! Ораза ұстағандарға ауызашар берудің де сауабы мол әрі ол мұсылман баласына тән дәстүр. Хадистерде ауызашарға келген кісі дастархан басында отырған кезде үй иесіне періштелердің дұға ететіндігі айтылған. Бір хадисте: «Қияметте Алла Тағала кей адамдардан: «Маған неге ас жегізбедің?» – деп сұрайды. Әлгі адам: «Сен барлық әлемдердің Раббысы, Иесісің ғой, мен саған қалайша ас бермекпін?» – дейді. Сонда Алла Тағала: «Қарны аш бауырыңа (ауыз аштырмадың) тамақ бермедің. Егер оған (ауыз аштырғаныңда) маған ас жегізгендей сауап алар едің», – дейді. Биыл жан басына берілетін пітір мөлшері 535 теңге болып бекітілді.

Қадірлі қауым! Ізгілік айы – Рамазан құтты болсын! Қасиетті айда ұстаған оразамыз, жасаған дұға-тілектеріміз, құлшылық-ғибадаттарымыз, әрбір қайырлы амалдарымыз қабыл болсын! Алла Тағала отбасымызға амандық, жұмысымызға береке мен бірлік нәсіп етсін! Тәуелсіздігіміз тұғырлы, елдігіміз ғұмырлы болсын! Әмин! Төлеген Арғынбайұлы Керімбаев, Қосшы қалалық «Бөгенбай батыр» мешітінің имамы