Қазанғаповтар отбасына құрмет көрсетілді

15.09.23 сағат 01:08 Қосшы жаңалықтары

475

Астанада «Мерейлі отбасы – 2023» байқауының жеңімпаздарына құрмет көрсетілді. Қазақстан орталық концерт залында өткен республикалық кезеңде ҚР Мәдениет және ақпарат министрі, Президент жанындағы Әйелдер істері және отбасылық-демографиялық саясат жөніндегі ұлттық комиссияның төрағасы Аида Балаева еліміздің барлық өңірлерінен қатысқан үздік жиырма отбасын марапаттап, бір миллион теңгеден қаржылай сыйлық табыс етті. Биыл ұлттық байқауға республика бойынша 3 мыңнан астам отбасы қатысып, 20 жұп жеңімпаз атанды. Олардың қатарында жерлестеріміз Қазанғаповтар отбасы да бар. Облыстық кезеңнен жеңімпаз атанған қосшылықтар республикалық кезеңге жолдама алған еді. Олар 6 бала тәрбиелеп өсірген. Әулетте мұғалімдер, әскери қызметкерлер, сот жүйесінің қызметкерлері бар.

– Біз екеуміздің отасып, үй болғанымызға мінекей 44 жыл. Адамның осылай өсіп-өнуі, семьяны сақтап қалуы өзіне байланысты. Ең бірінші мәселе сабырлық керек, ауызбіршілік керек, әр уақытта қандай жағдай болмасын ақылдасып отырып, ортақ шешімге келу керек. Сондай жағдайда ұрыс, ешқандай келіспеушілік деген болмайды, – дейді отағасы Ыбырай Қазанғапов.

«Мерейлі отбасы» ұлттық байқауының бастау алғанына биыл 10 жыл. Осы жолы облыс бойынша біршама өтінім келіп түскен.

ОБЛЫС ӘКІМІ МАРАПАТТАДЫ

Қазақ халқының отбасылық тәрбиесін ұлттық құндылық ретінде жандандыру мақсатындағы сайыстың Көкшетауда өткен марапатына үздік деп танылған 7 жанұя қатысты. Үлгілі, үздік деп танылған отбасыларға диплом және ақшалай сыйлықтар табысталды. Олардың арасында Қосшы қаласының Ыбырай-Бибісара Қазанғаповтар да бар. Елге сыйлы әулет бас жүлдеге 500 000 теңге ақшалай сыйлық сертификатына ие болды. Іс-шараға Ақмола облысының әкімі Марат Ахметжанов қатысты. Аймақ басшысы Қасым-Жомарт Тоқаевтың Қазақстан халқына арнаған Жолдауында отбасы құндылықтарын нығайту жолына ерекше назар аударғанын атап өтіп, жеңімпаз отбасын марапаттады. Байқаудың бас жүлдесін Қосшы қаласында тұратын Қазанғаповтар отбасы иемденді.

– «Мықты және ұйымшыл отбасылар – гүлденген қоғамның көрсеткіші. Оларды танымал ету және мәртебесін арттыру мақсатында елде көптеген іс-шаралар өткізіледі. Маңыздыларының бірі – «Мерейлі отбасы» дәстүрлі ұлттық байқауы. Данышпанның да ғалымның да ең алғашқы тәлім-тәрбиесі осы үйден басталады, – деді Ақмола облысының әкімі Марат Ахметжанов.

Жыл сайынғы байқаудың қорытындысы бойынша бірінші орын Біржан сал ауданынан қатысқан Күсеп Сатыбалдиновтың отбасына бұйырды. Екінші орын зеренділік Қуанышбек Әлібайұлының жанұясына берілді. Жүлделі үшінші орынды Қосшы қаласынан Якуб Мәулеттің отбасы иеленді.

Динара НҰРАХМЕТ