Конституцияның 30 жылдығына арналған конференцияда Президент Қасым-Жомарт Тоқаев сөз сөйледі

Мемлекет басшысы Қасым-Жомарт Тоқаев Қазақстан Конституциясының 30 жылдығына арналған халықаралық ғылыми-практикалық конференцияда сөз сөйледі, деп хабарлайды JANABASTAU.KZ ақпарат агенттігі. 

Президент өз баяндамасында Ата заңның мемлекетіміздің берік іргетасы әрі Тәуелсіздіктің басты тірегі екенін атап өтті. Ол Конституция қабылданғаннан бергі тарихи кезеңдерге тоқталып, 1995 жылғы референдумның маңызын ерекше бағалады.

Тоқаев соңғы жылдары жүзеге асқан конституциялық реформаларға да кеңінен тоқталды. Оның айтуынша, түзетулердің нәтижесінде Конституция баптарының үштен бірі жаңартылды. «Күшті Президент – ықпалды Парламент – есеп беретін Үкімет» қағидаты бекітіліп, саяси жүйе жаңа сипатқа ие болды. Президенттің жеті жылға бір рет сайлануы ел тарихындағы маңызды қадамдардың бірі екенін айтты.

Мемлекет басшысы заң үстемдігін қамтамасыз етуге бағытталған өзгерістерге тоқтала отырып, Конституциялық соттың құрылуы, сот жүйесін жаңғырту, прокуратура мен Адам құқықтары жөніндегі уәкілдің өкілеттіктерін күшейту сынды шаралар әділетті қоғам қалыптастыруға жол ашқанын жеткізді.

Сонымен қатар, Тоқаев «Ұлттық қор – балаларға» бағдарламасы мен әлеуметтік әділеттілікке бағытталған заңнамалық өзгерістерді атап өтті. Ол Конституция әрдайым адам құқығының темірқазығы болып қала беретінін баса айтты.

Президент реформалардың арқасында билік пен қоғам арасындағы байланыстың жаңа деңгейге көтерілгенін, елдің саяси және әлеуметтік дамуының бағыты айқындалғанын жеткізді. «Әділетті Қазақстанды құру процесін енді ешкім тоқтата алмайды», – деді Мемлекет басшысы.

Жиын соңында Тоқаев Конституцияның 30 жылдығына орай бірқатар азаматты мемлекеттік наградалармен марапаттайтынын мәлімдеді.