Минфин жаңа бақылау әдісін енгізуде: шығыныңыз табыстан асса, тексеріс басталады

ҚР Қаржы министрлігі салықтық бақылауды күшейтуге бағытталған жаңа бастамасын жариялады. Жоба аясында азаматтардың нақты шығындары ресми табыстарымен салыстырылып, сәйкессіздік анықталған жағдайда тексеріс жүргізілмек, деп хабарлайды JANABASTAU.KZ ақпарат агенттігі.

Жаңа әдістің ерекшелігі

«Жанама бақылау әдісі» деп аталатын бұл тәсіл азаматтың өмір салты мен ресми табысы арасындағы айырмашылықты анықтауға мүмкіндік береді. Мәселен, ай сайынғы ресми табысы 500 мың теңге деп көрсеткен азамат жыл соңында одан бірнеше есе қымбат жылжымайтын мүлік сатып алса, салық органдары қаражаттың көзін тексере алады.

Қандай деректер есепке алынады

Тексеру барысында салық декларациясымен қатар келесі ақпарат көздері пайдаланылмақ: банктік үзінділер мен есептер; жылжымайтын мүлік пен көлікке қатысты тіркеу мәліметтері; ұйымдар мен үшінші тұлғалардан түскен ақпарат.

Бұл жүйе салық органдарының азаматтардың табысы мен шығынын кешенді түрде саралауына жол ашады.

Күтілетін нәтижелер

Қаржы министрлігінің пайымынша, жаңа әдіс: салық әкімшілендіруін тиімді етеді; табысты жасыру жағдайларын анықтайды; ірі шығындарды жасырын өткізуге тосқауыл болады; ел ішіндегі қаржы айналымының ашықтығын күшейтеді.

Азаматтарға әсері

Жаңа талап күшіне енсе, қазақстандықтар табыс пен шығынды рәсімдеуде мұқият болуға тиіс. Ресми табыспен расталмаған ірі сатып алулар салық органдарының қосымша бақылауына ілігуі мүмкін.