Қазақстанда инфляция төмендеуін жалғастыруда

2026 жылғы қыркүйекте Қазақстандағы жылдық инфляция 9,3%-ға дейін төмендеді. Бір ай бұрын, тамызда бұл көрсеткіш 9,8% болған. Айлық инфляция 0,6% деңгейінде сақталды, деп хабарлайды JANABASTAU.KZ Ұлттық статистика бюросына сілтеме жасап.

Қыркүйекте бірқатар азық-түлік өнімдері мен көкөністер арзандады. Атап айтқанда, пияз бағасы 20,7%, лимон – 13,9%, сәбіз – 13,6%, картоп – 13,4%, баклажан – 11,2%, қырыққабат – 10,1%, тәтті бұрыш – 6,5%, алма – 5,3%, алмұрт – 2,4%, сарымсақ – 1,3%, банан – 0,7% төмендеді.

Сондай-ақ балалар тағамына арналған ботқалардың бағасы 6,1%, құмшекер 1,3% арзандады.

Азық-түлікке жатпайтын тауарлар арасында қол кремінің бағасы 6,9%, балалар жаялықтары – 6,6%, теледидар – 5,6%, ыдыс жуатын машиналар мен қысқа толқынды пештер – 1,8%, душқа арналған гель – 1,4% төмендеді.

Жылдық есепте азық-түлікке жатпайтын тауарлар 11,0%, ақылы қызметтер 8,9%, азық-түлік тауарлары 8,5% қымбаттады.

2025 жылғы қыркүйекпен салыстырғанда да кейбір жеміс-көкөніс өнімдерінің бағасы төмендеген. Алма 11,1%, лимон – 8,3%, қызылша – 6,9%, қырыққабат – 6,1%, банан – 5,6%, тәтті бұрыш – 3,9% арзандады.

Азық-түлікке жатпайтын тауарлар ішінде автомобильдердің бағасы бір жылда 11,3%, электр жылытқыштар – 9,1%, кондиционерлер – 8,7%, электр еттартқыштар – 5,6%, балалар конструкторлары – 2,6%, медициналық маскалар – 1,7% төмендеген.

Инфляция деңгейін сипаттайтын тұтыну бағалары индексі ай сайын есептеледі. Баға мониторингі тауарлар мен көрсетілетін қызметтердің 537 позициясы бойынша жүргізіледі.

2026 жылғы қаңтардан бастап тұтыну бағалары индексін есептеу кезінде азық-түлік тауарларының үлесі 41,1%, азық-түлікке жатпайтын тауарлар 28,4%, ақылы қызметтер 30,5% болып белгіленген.