Қазақстандықтар зейнетақы жинақтарын шетелдік активтерге инвестициялай алады

Қаржы нарығын реттеу және дамыту агенттігі зейнетақы активтерін басқару ережелеріне түзетулер енгізді. Енді басқарушы компаниялар қазақстандықтардың зейнетақы жинақтарының 80%-ына дейін шетел валютасындағы құралдарға инвестициялай алады, деп хабарлайды JANABASTAU.KZ ақпарат агенттігі.

Қаржы нарығын реттеу және дамыту агенттігі зейнетақымен қамсыздандыру жүйесіне енгізілетін жаңалықтарға қатысты қаулы жобасын жариялады. Құжатқа сәйкес, 2026 жылғы 1 қаңтардан бастап басқарушы компаниялардың қызметін бағалау орташа  өлшенген нәтижелер бойынша емес, композиттік индекстер арқылы жүргізіледі. Бұл индекстер Қазақстанның қор нарығы мен әлемдік қаржы алаңдарының көрсеткіштерін қамтиды.

Жоба аясындағы басқа өзгерістердің ішінде зейнетақы активтерін шетел валютасында көрсетілген құралдарға инвестициялаудың жаңа лимиттері енгізіледі. Қазіргі уақытта мұндай инвестициялар жалпы активтердің 60%-ына дейін рұқсат етіледі.

Келесі лимиттер бекітілді:

- зейнет жасына қарамастан зейнетақы активтерінің 30%-ына дейін – табыстылықтың ең төменгі мәні 1 жылдық есеп негізінде анықталады;

- зейнетке шығуына 3 жылдан астам қалған салымшылар үшін активтердің 60%-ына дейін – табыстылықтың ең төменгі мәні 36 ай (3 жыл) бойынша есептеледі;

- зейнетке шығуына 13 жылдан астам уақыт қалған салымшылар үшін активтердің 80%-ына дейін – табыстылық 60 ай (5 жыл) бойынша есептеледі.

Зейнетақы жинақтарын басқарушы компанияға сенімгерлік басқаруға бергісі келген қазақстандықтар БЖЗҚ-ға өтініш беруі тиіс. Өтініште басқарушы компания белгілеген портфель қалыптастыру критерийі, яғни зейнетақы активтерінің шетел валютасындағы құралдарға инвестициялау лимиті көрсетілуі қажет.