«МаманQadam»: Степногорскте оқушыларды жұмысшы мамандықтарына дайындайды

Степногорск Жоғары колледжінде оқушыларға сұранысқа ие жұмысшы мамандықтарын меңгеруге мүмкіндік беретін жаңа «МаманQadam» білім беру жобасының салтанатты ашылуы өтті. Бастама «АК Алтыналмас» АҚ қолдауымен және Ақмола облысының Тау колледжімен бірлесе жүзеге асырылып жатыр, деп хабарлайды JANABASTAU.KZ ақпарат агенттігі.

Жоба 10–11 сынып оқушыларына арналған және алғашқы практикалық дағдыларды алуға, заманауи құрал-жабдықтармен танысуға және болашақ мамандықты саналы түрде таңдауға мүмкіндік береді. Жоба Президент жариялаған Жұмысшы мамандықтар жылы аясында ерекше маңызға ие болып отыр, бұл білікті кадрларды даярлау мен техникалық білім беруді дамыту мәселесін өзекті етеді.

Ашылу салтанатына Ақмола облысы Білім басқармасының өкілдері, қала әкімінің орынбасары Дархан Оспанов, қалалық Білім бөлімінің басшысы, «АК Алтыналмас» АҚ жетекші мамандары, колледж оқытушылары мен әкімшілігі қатысты.

Іс-шара барысында қонақтар колледждің индустриалды корпусымен, оқу аудиториялары мен зертханаларымен танысты. Экскурсия кезінде олар студенттермен және колледждің биылғы түлектерімен сөйлесті. Солардың ішінде — 4-курс студенті, «Машина жасау технологиясы» мамандығы бойынша оқитын Анна Мельник, ол оқуын өндірісте жұмыс істей отырып қатар алып жүр.

Қатысушылар «АК Алтыналмас» АҚ жетекші мамандарының қонақ дәрісіне ерекше көңіл бөлді. Дәрісте қазіргі заманғы жұмысшы біліктілігіне қойылатын талаптар, өндірістік саладағы мансаптық мүмкіндіктер және техникалық мамандықтардың экономикалық дамудағы рөлі сөз болды.

Жоғары колледж директоры Елена Тарасова жобаның оқушылар үшін маңыздылығын атап өтті:

Менің ойымша, «МаманQadam» жобасы біздің балалар үшін маңызды болады. Ол оларға нақты мамандықтарды байқап көруге және бүгінгі таңда қандай мамандықтар сұранысқа ие екенін түсінуге мүмкіндік береді. Мұндай ынтымақтастық болашақ мамандықты саналы түрде таңдауға септігін тигізеді және біздің өңірде дамуға жақсы мүмкіндіктер ашады, — деді ол.

«МаманQadam» Степногорск қаласында алғаш рет жүзеге асырылып отырған жоба болып табылады. Ол мектеп, колледж және кәсіпорынды біріктіріп, оқушыларға әртүрлі бағыттарда өз күштерін сынауға мүмкіндік береді. Жобаның мақсаты — балаларға болашақ мамандықты саналы түрде таңдауға көмектесу, кәсіби бағдар беру сапасын арттыру және қазіргі заманғы еңбек нарығында сұранысқа ие мамандарды дайындау болып табылады.