TikTok АҚШ-та қызметін қайта іске қосты

Қытайлық TikTok қосымшасы АҚШ-тағы 170 миллионнан астам пайдаланушы үшін қызметін қайта жандандырды. Бұл шешім жаңадан сайланған президент Дональд Трамптың платформаға уақытша рұқсат беру туралы жарлыққа қол қоятынын мәлімдегеннен кейін қабылданды,  деп хабарлайды JANABASTAU.KZ bbc.com сайтына сілтеме жасап. 

Еске салайық, сенбі күні кешке TikTok АҚШ аумағында жұмысын тоқтатқан болатын. Себебі ұлттық қауіпсіздікке байланысты қабылданған заң күшіне еніп, қосымшаны пайдалануға тыйым салынған еді.

Алайда Трамп жексенбі күні TikTok-ты бұғаттау туралы шешімді кейінге шегеруге уәде берді. Оның айтуынша, қосымшаның болашағына қатысты нақты келіссөздер жүргізу үшін қосымша уақыт қажет.

TikTok компаниясы "қызметті қалпына келтіру жұмыстары жүргізіліп жатыр" деп мәлімдеді. Қосымша қайта іске қосылғаннан кейін пайдаланушыларға Дональд Трампқа алғыс айтылған арнайы хабарлама шықты.

Ресми мәлімдемеде TikTok компаниясы жаңа президентке "қажетті анықтық пен сенімділік бергені үшін" ризашылығын білдіріп, АҚШ-та қызметін ұзақ мерзімді негізде жалғастыру үшін билік өкілдерімен тығыз ынтымақтастық орнатуға дайын екенін хабарлады.