«AMANAT» партиясы Қосшыдағы жаңа салынған мектеп пен аурухана құрылыстарын аралады

20 шілде күні «AMANAT» партиясының Ақмола облысы бойынша атқарушы хатшысы Айна Мысырәлімова Қосшы қаласы және Целиноград аудандарына жұмыс сапарымен келді, – деп хабарлайды Janabastau.kz тілшісі. Облыстан қаламызға арнайы келген Айна Мысырәлімова қала әкімі Гайдар Қасеновпен кездесіп, жаңа қаланың дамуы жайында сөйлесті. «Жол картасы – партияның бағдарламасын іске асыру бойынша 5 жылға арналған нақты іс-қимыл жоспары. Барлық жоспарды тиімді  орындау халықтың өмір сүру сапасы мен әл-ауқатын арттыруға мүмкіндік береді», – деді «AMANAT» партиясының Ақмола облысы бойынша атқарушы хатшысы Айна Мысырәлімова. Сондай-ақ, Айна Ермекқызы «AMANAT» партиясының «Өзгерістер жолы: Әр азаматқа лайықты өмір!» атты сайлауалды бағдарламасын іске асырудың облыстық жол картасы аясында Қосшы қаласында ауысымына 100 келушіге арналған емхана және жаңа оқу жылында ашылғалы отырған 1200 орындық мектеп құрылысының жұмыстарымен танысты. «Қала мектептерінің қатары тағы бір білім ордасымен толығады. Жаңа салынған мектептің ашылуы 2022-2023 оқу жылына жоспарланып отыр. Мектеп ғимараты 1 қыркүйекте пайдалануға беріледі. Білім ордасы ашылғаннан кейін жаңа оқу жылына ата-аналардан өтініштер қабылданады», – деп таныстырды Қосшы қалалық білім бөлімінің басшысы Қанат Ахметов. Бұдан кейін «AMANAT» партиясының Ақмола облысы бойынша атқарушы хатшысы Айна Мысырәлімова Целиноград ауданына барды.