Ардагерлер ән салды

«Қатарымыздағы өнерпаздардың басым көпшілігі ұстаздық қызметте болған ардагерлер. Жас кезінен елге адал қызмет жасап келе жатқан кісілер әлі күнге дейін сол міндетінен таймаған. Алдағы уақытта Ерейментау, Қорғалжын аудандарына барып, шығармашылық концертімізді беруді жоспарлап отырмыз. Біздің міндет – ұлттық құндылықтың құнын арттырып, маңызын жеткізу. Топтың орындауындағы «Қосшы менің жыр-әнім» атты туынды көпшілік жерде аймағымыздың ұраны, бренді сияқты қабылданады. Әннің авторлары Қадырхан Қизатұлы мен Ахметхан Алпысбаев сияқты біртуар, талантты азаматтар», дейді Қосшы қаласы Ардагерлер кеңесінің төрағасы Қабділбар Көпжасарұлы ән кешінің мән-маңызын түсіндіріп. Ардагерлердің талап-тілегіне қолдау білдірген аудан әкімшілігінің орны ерекше. Сондай-ақ концерттің жоғары деңгейде, сапалы құрылғылармен жабдықталып өтуіне атсалысқан Мәдениет үйі басшылығының да үлесі зор. Бірнеше сағатқа созылған шығармашылық ән кешіне жиылған жұрт бой шымырлатар есті ән тыңдап, тәтті күйге бөленді. Әдемі әсер алған көрермен концерт ұйымдастырушыларына ризалығын білдірдіріп, тарасты. Қосшы қаласының берекесі мен бірлігін нығайтып, қарттарын ардақтап, ұлттық құндылығымызды дәріптеп жүрген Ардагерлер кеңесінің орны ерекше. Елдің дамуына сүбелі үлес қосып, маңызды мәселелердің күрмеуін шешуге атсалысып жүрген кеңестің жұмысы әлі де жандана түсері сөзсіз.