Атышулы Эпштейннің құжатында Қайрат Келімбетовтің аты аталды

Жасөспірім қыздарды азғындыққа салғаны үшін айыпталған американдық миллиардер Джеффри Эпштейнге қатысты құжатта Қазақстан Ұлттық банкінің бұрынғы басшысы Қайрат Келімбетовтің аты табылды, деп хабарлайды JANABASTAU.KZ ақпарат агенттігі Orda.kz-ке сілтеме жасап.

ОҚИ ОТЫРЫҢЫЗ: Трамп Эпштейннің құпия файлдарын жариялау туралы заңға қол қойды

Трамп Эпштейн ісін қайта тергеуді талап етті

Құжатқа жария болған мәліметтерде Эпштейнмен кездескен әртүрлі беделді қонақтардың аттары тізілген. Аустралияның бұрынғы Премьер-министрінен бастап, ірі инвестициялық қорлардың басшылары мен Нобель лауреаттарына дейінгі адамдармен кездесулер егжей-тегжейлі сипатталған. Кездесулердің нақты тақырыбы көрсетілмеген, бірақ жалпы контекст — әлемдік нарықтар, геосаясат, жоғары технологиялар мен жаһандық трендтерді талқылау болып көрсетілген.

Осы танымал қонақтардың арасында Қайрат Келімбетовтің аты да бар. Деректерге қарағанда, кездесулер Манхэттендегі Эпштейннің жеке үйінде өткен.

Айта кетейік, Қайрат Келімбетов бұрын Экономика министрі, Ұлттық банк төрағасы және ҚР Президент Әкімшілігінің басшысы қызметтерін атқарған.

Қазіргі уақытта ол миллиардер Тимур Турловтың Freedom Holding компаниясының Директорлар кеңесінің мүшесі.

Еске сала кетейік, Джеффри Эпштейн жыныстық зорлық-зомбылық және кәмелеттік жасқа толмаған қыздарды азғындық жолмен пайдаланды деп айыпталған. 2019 жылы 10 тамызда АҚШ-тағы Манхэттендегі Metropolitan Correctional Center түрмесінде оның мәйіті табылған.