«Бақыт құшағында»: Қазақ тіліндегі алғашқы JukeBox мюзикл экранға шығады

Қазақстандық көрермендер үшін ерекше жаңалық: қазан айында үлкен экранға қазақ тілінде түсірілген алғашқы JukeBox мюзикл-фильмі жол тартады, деп хабарлайды JANABASTAU.KZ ақпарат агенттігі. 

Бұл — «Бақыт құшағында», қазақ музыкасының алтын қорына енген Шәмші Қалдаяқовтың әндері арқылы өрілетін романтикалық туынды. 

Шәмші әуеніндегі жаңа тыныс

Фильмнің желісі Шәмшінің ең танымал 13 шығармасының симфониялық оркестрге лайықталған жаңа өңдеуімен әрленген. «Бақыт құшағында», «Дүнген қызы», «Кешікпей келем деп ең», «Қуаныш вальсі», «Шынарым» секілді жүрекке жақын әндер экрандағы оқиға желісін сүйемелдеп, көрерменді ерекше атмосфераға жетелейді.

Махаббат пен достық туралы

Жоба романтикалық комедия мен музыкалық киноның синтезі ретінде ұсынылады. Фильмде қазіргі қоғамдағы қазақ қыздарының өмірлік таңдаулары, шынайы махаббаттың қадірі мен адал достықтың құндылығы басты тақырыпқа айналады. Бұл — көңіл көтеретін ғана емес, ой салатын, рухани нәр беретін кино.

Жұлдызды актерлік құрам

Басты рөлдерді Қазақстанның театр және кино өнерінің танымал тұлғалары сомдайды: Дәурен Серғазин,  Әлия Ануарбек (Телебарисова), Азамат Сатыбалды, Айнұр Ильясова, Шах-Мұрат Ордабаев, Лейло Ақназарқызы Бекназар-Ханинга, Алдабек Шалбаев, Оранбасар Тазабек, Алтынай Нөгербек, Айгүл Иманбаева. 

Осы бірегей актерлік ансамбль фильмге шынайылық пен эмоциялық тереңдік береді.

Қашан?

Фильмнің премьерасы — 23 қазан. Бұл күн Шәмші Қалдаяқовтың туғанына 95 жыл толуымен тұспа-тұс келеді.

Қазақ тіліндегі алғашқы JukeBox мюзикл — тек кино емес, ұлттық мәдениетке жасалған үлкен қадам. Шәмші әуендерімен өрілген махаббат хикаясы көпшілікке жаңа әсер, жаңа шабыт сыйлайды.