Қырғыз Республикасында Л.Н. Гумилев атындағы Еуразия ұлттық университетінің филиалы ашылды

Бішкек қаласында Л.Н. Гумилев атындағы Еуразия ұлттық университетінің Ош мемлекеттік университеті базасындағы филиалының салтанатты ашылу рәсімі өтті, деп хабарлайды JANABASTAU.KZ ақпарат агенттігінің тілшісі. Іс-шара Қазақстан Республикасының Президенті Қасым-Жомарт Тоқаевтың Қырғыз Республикасына ресми сапары аясында ұйымдастырылды.

Салтанатты шараға Қазақстан Республикасының ғылым және жоғары білім министрі Саясат Нұрбек, Қырғыз Республикасының ғылым, жоғары білім және инновациялар министрі Бактияр Орозов, ЕҰУ ректоры Ерлан Сыдықов, Ош мемлекеттік университетінің ректоры Құдайберді Қожобеков және екі елдің жоғары оқу орындарының өкілдері қатысты.

Президент Қасым-Жомарт Тоқаев сапар қорытындысы бойынша өткізген баспасөз брифингінде атап өтті:

«Былтыр Қырғызстан Президентінің Қазақстанға сапары аясында жастарымызды жақындастыратын бірқатар уағдаластыққа қол жеткізген едік. Соның нәтижесінде Ош қаласында ЕҰУ филиалы ашылып отыр. Бұдан бөлек, Қазақстан Үкіметі қырғыз студенттеріне 50 грант бөлді. Келесі жылдан бастап грант санын 60-қа дейін арттыруды жоспарлап отырмыз».

Филиал экология, ақпараттық-коммуникациялық технологиялар және қызмет көрсету саласы бойынша мамандарды даярлаумен қатар, орыс тілі мен әдебиеті, аударма ісі, шет тілі, журналистика және физика мамандықтары бойынша білім береді. Оқу бағдарламасын тәмамдаған түлектер қос дипломға ие болады.

Қазақстан Республикасының ғылым және жоғары білім министрі Саясат Нұрбек бұл бастаманың стратегиялық маңызын атап өтті:

«Филиал – екі елдің білім және ғылым саласындағы ынтымақтастығын жаңа деңгейге көтеретін қадам. Мұнда кадр даярлау, бірлескен зерттеулер мен қос дипломдық бағдарламаларды кеңейту арқылы өңірдің адами капиталын нығайтамыз».

ЕҰУ ректоры Ерлан Сыдықов та бұл жобаның аймақ үшін маңызын ерекше бағалады:

«Филиал қырғыз студенттеріне халықаралық стандарттарға сай жоғары сапалы білім алуға мүмкіндік береді. Сондай-ақ бірлескен ғылыми зерттеулерді дамытуға, инновацияларды енгізуге, экономика үшін қажетті мамандарды даярлауға ықпал етеді. Бұл бастама Орталық Азияның тұрақты дамуы мен өркендеуіне берік зияткерлік негіз қалайды».

Айта кетейік, Л.Н. Гумилев атындағы Еуразия ұлттық университеті қазіргі таңда академиялық ұтқырлық және қос дипломдық бағдарламалар бойынша Қырғыз Республикасының 16 университетімен ынтымақтастық орнатқан.