"Димашты көре алмайсың емес, түсіне алмайсың": Ақын Димаш Құдайбергеннің шығармасын сынады

 Ақын Салтанат Қайырбек танымал әнші Димаш Құдайбергеннің "Тау ішінде" әніне түсірілген бейнебаянына сыни пікір білдірді. Бұл жөнінде ол өзінің Facebook парақшасында жазды.

Ақынның айтуынша, бейнебаян 8 минуттық туынды ретінде татуировка, рок-эстетикасы және заманауи клишелермен басталып, көрерменнің назарын терең ұлттық мағынадан алыстатып жібереді.

"Димаштың «Тау ішінде» бейнебаяны татуировка жасауға үндеу, рок-эстетикасы мен замандық клишелерден басталады — бұл көркемдік шешім көрерменнің назарын тарихтан гөрі берірек, клиптік қабылдау деңгейіне ауыстырып жібереді," — дейді Салтанат Қайырбек.

Ол сондай-ақ мәдениеттанушы Александр Генистің: «Көркем бейне мәтінмен үндеспесе, мағына қосарлана алмайды. Онда тек эффект қалады, мән жоғалады» деген пікірін мысалға келтіріп, бейнебаянды ұлттық музыкалық мұраны интерпретациялау үлгісі ретінде қабылдауға келмейтінін айтқан.

"Бейнебаян көркем өнім ретінде қызықты болуы мүмкін, бірақ онда кемі «ақбоз ат» пен «сүмбіл шаш» болмаған соң, «Димашты көре алмайсың» дегеннен гөрі, «оның бейнебаянында болуы тиіс маңызды атрибуттарды көріпсің» деген абзал," — деп түйіндеді ақын.

Желі қолданушылары арасында пікір екіге бөлінді: бірі — Димаштың шығармашылық еркіндігін қолдаса, енді бірі ұлттық танымнан алыстау барын мойындайды.