Қала басшысы халықпен кездесті

 Қосшы қаласының әкімі Гайдар Қасенов халықпен кездесті. Атқарылған жұмыс барысын біліп, қордаланған мәселенің шешілу жолын білмекке келген халықтың қарасы мол. Әр саланың басшылары да маңызды шарада қатардан табылды. Ел алдында биыл атқарылған шаруа жайын сөз еткен қала басшысы: "Қадірлі жерлестер, Қосшы қаласы Ақмола облысының ішінде көптеген әлеуметтік-экономикалық көрсеткіштер бойынша үздіктер қатарында.  2023 жылдың 7 айының қортындысы бойынша қаланың әлеуметтік-экономикалық даму көрсеткіштерінің оң динамикасы байқалады" деді. Халықтың кәсіпкерлікпен айналысуына да жағдай жасалған. Бүгінде қалада 3070 шағын және орта бизнес субъектілері жұмыс істеп тұр.  Халық саны  жедел қарқынмен өсіп келеді. Алғашқы жарты жылдықта тек ересек тұрғындар саны ғана 5 мың адамға артып, жалпы саны 18 мыңға жеткен. Бұл есепке балалар алынбаған. Осы уақыт ішінде тұрғындар саны 274 адамға көбейген. Одан бөлек, мұнда тұрғылықты тіркеусіз тұрып жатқан, есепке ілінбегендері қаншама. Қазір ресми санақ бойынша халық саны 54 мыңға жеткен. Алайда ресми емес дерекке сенсек, тіпті 100 мыңнан асады. Қаланың сумен жабдықтау желілерінің ұзындығы - 158 шақырым, ауыз сумен қамтамасыз етілуі - 85%. Өткен жылдан бастап қатарға 1 500 абонент қосылған. Суды жалпы тұтыну - тәулігіне 7,5 мың текше метр, қуаты тәулігіне 10 мың текше метр. Коммуналдық қызмет атқарған жұмыстардың нәтижесінде күн сайын екі жарым мың текше метр ауыз суды үнемдеуге қол жетті. Халық тұтынатын су Нижнероманов кен орнында қазылған 29 ұңғымалар арқылы жүзеге асырылады, қазіргі уақытта оның 24-і пайдаланылса,  5-еуі резервте. Қазіргі күні республикалық бюджет есебінен сумен жабдықтау желілері құрылысының 4-ші кезегі жүргізілуде, 128,6 шақырым торап салу көзделген. Былтыр 30 шақырым су желісі тартылған, биыл 50 шақырым су желілері салынады, жобаның аяқталу мерзімі - 2024 жылдың желтоқсан айы. Қаражар сорғы станциясынан Қосшы қаласына дейін су құбырын салу жобасы әзірленді. Перспективалы құрылысы бар учаскелерді сумен жабдықтау бойынша жоба әзірленуде. Бұл – бесінші кезек. Болашақта су тапшылығын шешу үшін Нижний-Романов кен орнынан су құбырының екінші тізбегін салу нұсқасы жоспарда бар, онда тәулігіне 22 мың текше метр су қоры расталды. Биыл сумен жабдықтау және су ағызу жүйесіне ағымдағы жөндеу жұмыстары және кәріз сорғы станциясына күрделі жөндеу жұмысы жүргізілуде. Сонымен бірге Қосшы қаласының су бұру желілері ағымдағы жөндеуден өтті. Қала басшысының айтуынша, жеке инвестициялар есебінен ағымдағы жылы қуаттылығы тәулігіне он мың текше метрді құрайтын тазарту құрылыстары кешені жобасы әзірленуде. Сондай-ақ кәріз желілерін салудың екінші жобасы әзірленді. Одан бөлек, нөсер кәрізі құрылысының жобасы әзірлену үстінде. Бұл жобаны іске асыру кешенді жоспар шеңберінде 2023-2025 жылдардан бастап республикалық бюджет қаражаты есебінен көзделген. Қазіргі уақытта Қосшы қаласының бас жоспары әзірленуде, онда нөсерлі кәріз схемасы көрініс табатын болады. Бас жоспар бекітілгеннен кейін жобалық сметалық құжаттама әзірлеу басталады. Сараптама қорытындысын алғаннан кейін жоғарыда аталған жобалар бойынша бюджеттік өтінімдер салалық министрлікке жіберілетін болады. Республикалық бюджеттен уақтылы қаржыландыру кезінде іске асыруды бастау 2024 жылға жоспарланып отыр. Осы іс - шараларды іске асырсақ, қолданыстағы кәріз-тазарту құрылыстарының толық жобалық қуатын арттыруға мүмкіндік береді. Қала басшысы Гайдар Қасенов бұдан әрі қарай қосшылықтар үшін өзекті  болып отырған мәселе электрмен жабдықтау барысын сөз етті. Жылудың жайына келген қала әкімі: «Қалаға қуаты сағатына 75 гигакалорияға жететін Орталық қазандық арқылы жылытылады. Бүгінде қолданыстағы жылу энергиясының тапшылығы 5 гккал/сағ. құрап отыр. Ағымдағы жылы жылу беру маусымын өткізу үшін облыстық бюджеттен қазандық пен жылу желілерін ағымдағы жөндеуге, көмір сатып алуға және желілерге техникалық тексеру жүргізуге қомақты қаражат қарастырылған. Қаламызда құрылыс қарқынды жүруде. Жаңа тұрғын үйлерді, әлеуметтік нысандарды жылумен қамтамасыз ету мәселесі туындауда. Осы мәселені шешу үшін қолданыстағы қазандықтың қуатын сағатына 96 гигакалорияға ұлғайту бойынша жоба әзірленді, қазіргі уақытта сараптамада,- деп істің жайын тарқатты. Ал қаланы газдандыру мәселесіне келгенде шаһар басшысы Гайдар Қабдоллаұлы Халықты қолжетімді баспанамен қамтамасыз ету де бүгінгі күннің өзекті мәселесі. Бұл тұрғыда қала басшысы Гайдар Қабдоллаұлы: «Бүгінде 45 пәтерлі тұрғын үй салынуда. Бұл үй Қосшы қаласының кезекте тұрған тұрғындарына «Отбасы банкі» арқылы арзан бағада несие шарттары бойынша берілетін болады. Сондай-ақ проблемалық құрылыс объектілерінің үлескерлерімен жұмыс жүргізілуде. Жалпы, Кешенді жоспарда Қосшы қаласын дамытуға 30 іс-шара көзделген. Қосшы қаласының әкімдігі Ақмола облысы бойынша ең ашық әкімшілік деп сеніммен айта аламын. Әр сәрсенбі күні халықты қаабылдау жүргізіп отырамыз», -деп атқарылған істі жіп бойына тізгендей нақтылап берді. Жиылған жұрт аз уақыттың ішінде көзделген істің басым бөлігінің еңсерілгендігіне куә болды. Әріқарай уақыт оздырмай, қала басшысына бағытталған сұрақ үшін ашық микрофон ұсынылды. Қала тұрғыны Маржан Сәрсенова: «Неге "Лесная полянадағы" демалыс аллеясына күтім жасалмайтын болды? Біздің балалармен шығып демалатын орнымыз жоқтың қасы тіпті...Сосын біз жақта  заңсыз орналасқан сауда дүңгіршектері неге көбейіп кетті. Оларға шара көріліп жатыр ма?» деген сауалын жолдады. Қала басшысы: «Ойын алаңдарын абатттандырып, қалыпқа келтіру барысында жұмыс жоспары бар. Спорт алаңдары да салынады деп отырмыз. Конкурстық іріктеу барысының нәтижесін күтіп отырмыз. Әзірге маңайындағы мектеп алаңдарын пайдалануды ұсынар едім»,- деді. Тұрғынның екінші сауалына сала маманы «Соңғы уақытта менің білуімше 2 дүңгіршек пайда болды. Заң бойынша шағым түссе тексеріліп, орнынан алынып тасталады. Алдымен 2 мәрте айыппұл салынады, ескерту жасалынады. Содан кейін ғана нәтиже болмаса, сотқа жүгінеміз. Жыл соңына дейін "Лесная  полянаны" заңсыз сауда нүктелерінен толықтай тазартамыз деп уәде беремін»,- деп нақты жауап берді. Жазира Қожанқызы есімді қала тұрғыны: "Мен – "Лесная поляна" тұрғынымын. Су мен жарық жиі өшетін болды. Бітпейтін жөндеу жұмыстары. Тағы бір жайт – автобустың мәселесі. Діттеген жерімізге жарты сағаттап, автобус күтіп, тығылысып барамыз. Аялдаманың да жағдайы мүшкіл", – деді ол. "Қаңғыбас иттерді сирету үшін не жұмыс жүргізіліп жатыр?» деген сауалдарға қала басшысы: «Қаламызға иттер сырттан келмейді. Өзіміздің тұрғындардікі. Мердігерлер жұмыс істеңіздер. Сіздегі сауалдар осында жиылған мамандарға байланысты екен. Әр салаға қоятын сауалдарыңызды жазып, соған қарай бағыттап қалдырыңыз»,- деп қысқа қайырды. Қаланың белсенді ардагері Мадина Есханқызы: «Ойын алаңдары өте аз. Сол жағы реттелсе...» деген ұсынысына қала  Гайдар Қасенов « Ойын алаңдары туралы біз, алдымен, қоғамдық кеңесте қараймыз, депутаттармен ақылдасамыз. Мәслихат өкілі Әлихан Жұмаханұлы сөзімді толықтыра кетсін»,- деді. Аталған сауалға қатысты маман: «Біз депутаттардың тікелей көмегімен  облыстан тағы да қосымша 3  балалар алаңына қаражат сұраған болатынбыз. Байқау жарияланды. 10 күн ішінде нәтижесі жарияланады. Қандай орынға қойылатындығын жергелікті тұрғындармен ақылдасатын боламыз. Жұмыстың сапасын әр тұрғын үйдің белсенділері бақылайды»,- деп толықтырды. Шаһар тұрғыны Анар Есенқызы: «Мен ІТ мектебінің өкілімін. Мектеп маңайындағы жаяу жүргіншілер жолы, тротуар қашан реттеледі? Бұл – балалардың қауіпсіздігі үшін маңызды істердің бірі. Мектеп алдына тоқтайтын көлік көп. Кейде тіпті жүретін жол қалмайды. Осыны қашан реттейсіздер?» деген сауалына: «Біз мектеп алдына блоктар қоюды жоспарлап отырмыз. Келер аптада жұмысты аяқтап тапсырады»,- деп нақтылықпен жауап қатты.  Бұдан әрі де сауалдардың басым көпшілігі көшені жарықтандыру, қаңғыбас иттердің қатарын реттеу, жол құрылысы, су мәселесі төңірегінде өрбіді. Қала басшысы мамандардың  бәрі бір жерге жиылып отырғанда тұрғындардың жеке қабылдауға кіріп сауал, арыздарын қалдыруларына ұсыныс жасады. Президент Қасым-Жомарт Тоқаевтың «Әкімдердің халықпен кездесулерін өткізу туралы» Жарлығына сәйкес өткізілген кездесу ашық өткізілді деуге толық негіз бар.  Әкім ұсыныс-тілектердің назарға алынып, алдағы уақытта да нәтижелі істердің атқарылатындығын айтты.  

Гүлназ БИСЕН