Көбейтұз маңында экологиялық акция өтті (видео)

Қазақстан Республикасы Конституциясының 30 жылдығына орай, “Таза Қазақстан” акциясы аясында табиғаттың інжу-маржаны саналатын Көбейтұз көлінің маңында қоқыс жинау шарасы ұйымдастырылды, деп хабарлайды JANABASTAU.KZ ақпарат агенттігінің тілшісі.

Акцияға мемлекеттік қызметшілер, бюджеттік мекемелердің қызметкерлері, аудандық мәслихат депутаттары, сондай-ақ “Жасыл ел” жасөспірімдер жасағының мүшелері белсене атсалысты. Жалпы саны 60-қа жуық ерікті табиғатқа жанашырлық танытып, туған өлкенің экологиялық тазалығына үлес қосты.

Көбейтұз көлі – халқымыздың баға жетпес қазынасы, табиғаттың аманаты. Осындай бастамалар арқылы жас ұрпаққа туған жердің сұлулығын сақтау, қоршаған ортаға қамқорлықпен қарау сияқты асыл құндылықтар дәріптелуде.

Экологиялық акцияға қатысқан жастардың көңіл күйі көтеріңкі болды. Әрқайсысы туған өлкенің тазалығы үшін үлес қосып жатқанын мақтан тұтты. Солардың бірі – Ерейментау әкімдігінің қызметкері Аманбек Ботагөз былай дейді:

– Бүгінгі іс-шара маған ерекше әсер қалдырды. Көбейтұз – тек табиғаттың сұлулығы емес, біздің ұрпаққа аманатталған қазына. Қолымызға қап алып қоқыс жинау – бір қарағанда қарапайым іс сияқты. Бірақ оның мәні зор: табиғатты қорғаудың үлкен бастамасы дәл осындай кішкентай қадамдардан басталады. Біз бүгін тек көлді тазалап қойған жоқпыз, сонымен бірге өзімізді тазарттық – туған жерге деген жауапкершілігімізді арттырдық. Мұндай игі істер жиі ұйымдастырылып тұрса екен деген тілегім бар.