Қосшы көшелері қазақтың марқасқаларының есімімен аталады

24.06.23 сағат 11:13 Редакция таңдауы

457

Қосшыда тағы 26 көше қазақтың кіл жақсы-жайсаңдарының, сүт бетіне шыққан қаймақтарының есімдерімен аталатын болды. Қалалықтар бұл жақсы жаңалықты бір жыл бойы тағатсыздана күтті. Әрине, оны түсінуге болады: ҚР Үкіметі жанынан құрылған республикалық ономастикалық комиссия – біреу, ал оған еліміздің түкпір-түкпірінен түсіп жатқан ұсыныстар көп. Дегенмен, «Жақсылықтың ерте-кеші жоқ» демекші, бұл хабар қосшылықтар үшін үлкен қуанышқа айналды.

Көшелердің жаңа атауы ішінде таэквон-до спортынан алты дүркін әлем чемпионы, 6-шы Дан (бұл барша мұсылман ұлты өкілдері арасында ең жоғарғы дәреже), өзі алты тілде сөйлеген батыр –Мұстафа Өзтүрік, қазақ боксының атасы, рингте 223 кездесу өткізіп, оның 199-ында жеңіске жеткен, Қазақ ССР-інің 3 дүркін чемпионы Шоқыр Бөлтеков, грек-рим күресінен халықаралық спорт шебері, қазақтан шыққан тұңғыш Олимпиада чемпионы, әлем чемпионы және екі дүркін Кеңес Одағының чемпионы Жақсылық Үшкемпіров, Алашорда үкіметінің айтулы өкілдері – Жаһанша Досмұхамедұлы, Қошке Кемеңгерұлы, Ахмет Бірімжанов, ақын, дін қайраткері Ақыт Үлімжіұлы, мемлекет және қоғам қайраткерлері – Еркін Әуелбеков, Жұмабек Тәшенев, Нұртас Оңдасынов және есімдері әрбір қазаққа ыстық ақын-жазушы мен әнші-композиторлар бар. Жұрт біліп жүруі үшін олардың бірқатарын атай кетейік: Әміре Қашаубаев, Нұрғиса Тілендиевті, Ескендір Хасанғалиев, Асқар Сүлейменов, Төлеген Айбергенов, Герольд Бельгер, Жұмекен Нәжімеденов, Ақселеу Сейдімбек, Әбіш Кекілбаев... Айтпақшы, бір көше өнер сүйер қауымның көзайымына айналған марқұм Батырхан Шүкеновтің де есімімен аталатын болды. Қазіргі күні Үкіметтік комиссия қарауында 681 ұсыныс жатыр. Кеше құзырлы орган 18 оқу орны мен Көкшетау, Қосшы, Степногорск(Ақмола обл), Арыс(Түркістан обл) және Талдықорған(Жетісу обл) қалаларындағы 69 көшені қайта атау туралы шешім шығарған.

Дәулет АСАУ