Қосшыда тағы бір балабақша ашылды
1443
Өмірін ұстаздыққа арнаған ақсақал Қызыр Әбдеш, жоғары санаттағы дәрігер, ұстаз Амантай Әбиден, әнші ҚР Еңбек сіңірген қайраткері Құрманбек Әлімғазы жаңа ғимараттың лентасын қиды.
Салтанатты шарада «Әлфия» балабақшасының құрылтайшысы, жоғары санаттағы дәрігер, денсаулық саласының үздігі, зерттеуші, ҚР Қоғамдық ғылымдары академигі Қайрат Айдарханұлының авторлық кітабының көрмесі қойылды. Мерекелік дастархан жайылып, бүлдіршіндер ән-би өнерлерін паш етті.
Мерекелік дастархан жайылып, бүлдіршіндер ән-би өнерлерін паш етті. Сондай-ақ арнайы қонақ болып келген өнер иелері ҚР Еңбек сіңірген қайраткері Құрманбек Әлімғазы мен әнші, ҚР Еңбек сіңірген қайраткері Риза Қайырбайқызы өнер көрсетті.
Шараның ресми бөлігінен кейін қонақтар балабақша ішін аралап көрді. Балабақша үш қабатты, бірінші қабатында 20 орындық 2 ересек тобы жайғасқан. Сондай-ақ балаларды тамақтандыру, денсаулығын қадағалау санитарлық-гигиеналық талаптарды сақтау мақсатында жуынатын бөлме, асхана, медицина бөлмесі және кір жуу блоктары орналасқан. Барлық бөлмелер заманауи қондырғылармен жабдықталған. Сондай-ақ мәдени іс-шара өтетін акт залы және дене шынықтыруға арналған спорт зал жұмыс істейді. 2-қабатта «Ботақан», «Құлыншақ», «Балапан» атты кіші үш топ бар. Ал 3-қабатта орта 4 топ орналасқан және 1 оқу залы қызмет көрсетеді. 
630 шаршы метр құрайтын балабақша ауласында футбол алаңы мен ойын алаңшалары жасақталған.
– Балабақша ашу көкейде жүрген іс еді. «Баланы бесіктен» деп қазақ халқы бекер айтпаған. Балаларымыз – болашағымыз. Осы орайда ұлым Өркенмен, жалпы отбасыммен ақылдаса келе, балабақша ашуды жөн көрдік. Елін сүюге, имандылыққа, білімге, қазақ тілін қадір тұтуға үйретуді, бойына сіңіруді мақсат еттік. «Бала – балдан тәтті, немере – жаннан тәтті» дейді ғой. Балабақша атауына төртінші немерем Әлфияның аты берілді. Біздің мекемеде ең бірінші баланың денсаулығына, ас-суы мен біліміне ерекше мән беріледі, – дейді «Әлфия» балабақшасының құрылтайшысы Қайрат Айдарханұлы.
– Заман талабына сай орнатылған қажеттіліктердің барлығы да бүлдіршіндер үшін. Болашақта білікті, білімді балалар тәрбиелеп шығу – басты мақсатымыз. Бұл әрине, бастамасы, алдағы уақытта балабақша ауқымы бұдан да кеңейіп, бөлімшелері ашылды деген жоспар бар, – дейді «Әлфия» балабақшасының директоры Гүлнұр Тұрсынбекқызы.
– Балабақша өз жұмысын қарқынды бастап кетті. Қазіргі уақытта балаларды қабылдап жатырмыз. Қосшы тұрғындары мен ата-аналарға айтарым, балақандарыңызды қазақтілді білім беретін біздің балабақшаға сеніп тапсыруларыңызға болады. Балабақша Қосшы қаласы, Қажымұқан көшесі 176 үйде орналасқан, – дейді «Әлфия» балабақшасының әдіскері Ботагөз Рамазанқызы.
Салтанат Есенқұлова
Пікірлер (0)