Партия атауы да, жұмыс стилі де өзгерді

22.09.23 сағат 05:11 Редакция таңдауы

211

«AMANAT» партиясы Қосшы қалалық филиалының I конференциясы өтті. Жиын барысында партияның Қосшы қалалық филиалының cайлау органдарының құрамы сайланды. Сонымен қатар аталмыш іс-шарада Мемлекет басшысы Қасым-Жомарт Тоқаевтың «Әділетті Қазақстанның экономикалық бағдары» атты Қазақстан халқына Жолдауының негізгі бағыттары талқыланды. Партия белсенділерінің қатысуымен өткен конференцияға «AMANAT» партиясы Ақмола облыстық филиалының атқарушы хатшысының орынбасары Ақманат Әлімбетова қатысты. Ол жалпы атқарылған жұмыстар жайлы сөз қозғап, 2022 жылдан бастап партия едәуір өзгерістерге ұшырағанын атап өтті. Яғни партияның атауы да өзгерді, оның мақсат-міндеттері, жұмыс жасау стилі де басқа форматқа ауысты.

– Біздің жұмысымыздың бағыттары, мақсаттары мен міндеттері айқындалған жаңа саяси платформа қабылданды. Бұл құжат партияның идеологиясын нақты тұжырымдайды. Партия жұмыстарының жаңа форматтары туралы айтып өтсек. Біріншіден, сайлауалды бағдарламаларды іске асыру бойынша жұмыстар күшейтілді. Өздеріңізге белгілі, партиямыздың 2023-2027 жылдарға арналған «Халықпен бірге!» сайлауалды бағдарламасын орындау жөніндегі Жол картасы бекітілді. Іс-шаралардың орындалу бойынша Қосшы қаласында жұмыстар жүргізілуде, – деді Ақманат Әлімбетова.

Партия халыққа жақын болудың, халықтың мұң-мұқтажын, өтініш, талап-тілектерін шешудің ыңғайлы форматын ойластырып, мобильді қоғамдық қабылдаулар өткізуді қолға алды. Әрбір өтінішті мұқият зерделеп, жергілікті билік өкілдерімен бірлесе шешу жолдары қарастырылады. Жұмысты жаңғыртудың тағы бір форматы – «Жер аманаты», «Ауыл аманаты», «Бақытты отбасы» «Ардагерлерді ардақтайық», «Кедергісіз келешек» сияқты партиялық жобаларды жүзеге асыру. Одан бөлек биыл партия «Халық банкімен» бірлесіп, несиеге батқан ауыл тұрғындардың қарыздан құтылу жолдарын, жеке кәсіпкерлікпен айналысудың алғышарттарын түсіндіріп, заңгерлік көмек көрсетіп отыр

– Көпбалалы, аз қамтылған отбасыларды, аға буын өкілдерін, мүмкіндігі шектеулі жандарды қолдауға және олардың азаматтық ұстанымдарын жандандыруға бағытталған «Бақытты отбасы», «Ардагерлерді ардақтайық», «Кедергісіз келешек» бірегей партиялық жобалары бүгін жаңа мазмұнмен толықты. Осылайша, партияның бастамасымен «Баланы мектепке жинайық» республикалық акциясын өткізу дәстүрге айналды. Жыл сайын акция аясында аз қамтылған және көпбалалы отбасылардан шыққан 1 500-ден астам балаға партияластар демеушілік көмек көрсетеді, – деп толықтырды облыстық филиалдың атқарушы хатшысының орынбасары.

Қосшы аумақтық филиалының алдына қойылған міндеттер жетерлік, атқарылған істер де аз емес. Осы ретте Ақманат Әлімбетова шаһарымыздағы жаңадан сайланған Саяси кеңеске Бастауыш партия ұйымдарын құру арқылы, партия қатарының сапалық құрамы бойынша нақты жұмыстар жүргізу керектігін айтып өтті.

Орталық аппараттың келісімі бойынша тәжірибелі және белсенді партия мүшесі Рақымжан Сейдахметов тағайындалды. Қосшы қаласы мәслихатының төрағасы Әлихан Қуатбеков, Ардагерлер кеңесінің төрағасы Қабділбар Абақов, Қоғамдық кеңесінің төрайымы Сайра Матайбаева филиалдың алдағы жұмыстарына тек сәттілік тіледі. Ақмола облыстық мәслихатының депутаты Айдын Төребаев Қасым-Жомарт Тоқаевтың «ӘДІЛЕТТІ ҚАЗАҚСТАННЫҢ ЭКОНОМИКАЛЫҚ БАҒДАРЫ» Жолдауға тоқталып, құжаттағы ел экономикасын өркендетудің жаңа моделін тілге тиек етті.

– Адамзат тарихында бұрын-соңды болмаған сын-қатерлер мен түбегейлі өзгерістер дәуірі басталды. Осындай аса маңызды шақта зор экономикалық серпіліс жасауға еліміздің толық мүмкіндігі бар. Ол үшін біз біртіндеп жаңа экономикалық үлгіге өтуіміз керек. Бұл жұмысты батыл жүргізуіміз қажет. Басты мақсат – қағаз жүзіндегі биік жетістіктерге қол жеткізу емес, шын мәнінде халықтың тұрмыс сапасын жақсарту болуға тиіс» деп басталатын Жолдауда ел экономикасын дамытудың алдағы стратегиясы белгіленді, – деген ойымен бөліскен Айдын Төребаев партия жұмысына атсалысып, әріқарай бірге жұмыс істеуге сенімі зор екендігін алға тартты.

Қосшы қалалық филиалының I конференциясына қатысқан мәслихат депутаты, «Қосшы» Бастауыш партия ұйымының төрағасы Баянды Сахария Жолдауда жүктелген міндеттердің орындалуына, ауқымды жобалардың жүзеге асырылуына тілектестік білдірді.

Жиын соңында жиналғандар қалалық мәслихат төрағасы Әлихан Қуатбеков бастамасымен мәслихат депутаттары ашқан “Бірлік” аллеясына барды. Ақманат Әлімбетова депутаттарға ел игілігі үшін жасап жатқан еңбектеріне алғысын білдірді.

Жанар АХМЕТОВА