«Реалдықтар» Алматыға келетіндеріне көңілдері толмады

"Реал Мадрид ТВ" арнасында мадридтік клубтың Қазақстанға жасайтын алдағы сапары талқыланып, студия жүргізушілері бұл қашықтықтың тым алыс екенін айтып наразы болды, деп хабарлайды janabastau.kz ақпарат агенттігі Skifnews.kz ақпарат порталына сілтеме жасап. 

Чемпиондар лигасының жалпы кезеңінде "Реал" алматылық "Қайратпен" кездесетін болды.

"Таң қаларлық жайт емес. Әдеттегідей ең ұзақ сапар тағы бізге бұйырды. Тура бағытпен алты жарым мың шақырым, Қытайдың іргесінде. Өз үйімізден тым жырақтамыз. "Реал" тағы да ең ауыр жеребеге тап болды. Өткен маусымдағы секілді, бірінші себеттегі фавориттерге қарағанда бізге ең қолайсыз жағдай жасалды", – деді жүргізушілердің бірі.

"Ең қызығы, екі маусым қатарынан жеребе компьютер арқылы өтті. Бірақ бұл әділетсіз көрінеді. Мәселе қарсыластың мықтылығында ғана емес, бізге әрдайым ең ұзақ әрі ең қолайсыз сапарлар тиеді. Қытай шекарасы небәрі үш жүз шақырым жерде", – деп қосты екінші жүргізуші.

Айта кетейік, "Қайрат" өз алаңында бельгиялық "Брюггемен", гректің "Олимпиакосымен" және кипрлік "Пафоспен" ойнайды. Ал сырт алаңда алматылықтар Лондонның "Арсеналына", Миланның "Интеріне", Данияның "Копенгагеніне" және Португалияның "Спортингіне" қарсы өнер көрсетеді.