Тоқаев Назарбаевтың рөлін мойындады, бірақ өзі таңдаған жол - мүлде бөлек

Бүгін елордада өткен Қазақстан Конституциясының 30 жылдығына арналған ғылыми-практикалық конференцияда Мемлекет басшысы Қасым-Жомарт Тоқаев сөз сөйлеп, еліміздің негізгі заңының тарихи маңызына және оның қалыптасуындағы Тұңғыш Президент Нұрсұлтан Назарбаевтың рөліне ерекше тоқталды, деп хабарлайды JANABASTAU.KZ ақпарат агенттігі. 

Президент өз сөзінде 1993 жылы қабылданған алғашқы Конституцияның тәуелсіздіктің алғашқы кезеңінде маңызды рөл атқарғанын, алайда уақыт ағымына сай жаңа құқықтық құжаттың қажеттілігі туындағанын атап өтті.

– 1995 жылғы Конституцияны әзірлеу барысында арнайы кеңес құрылып, шетелдік сарапшылар тартылды. Миллиондаған азамат жобаны талқылауға қатысты. Бұл – нағыз қоғамдық үнқатысудың көрінісі. Осы тарихи процесте Тұңғыш Президент Нұрсұлтан Назарбаевтың қажырлы еңбегін ерекше атап өткен жөн, – деді Мемлекет басшысы.

Тоқаев соңғы 30 жыл ішінде Конституцияға алты рет өзгеріс енгізілгенін атап өтті. Алайда Президенттің айтуынша, ең ауқымды әрі жүйелі реформалар 2022 жылғы Қаңтар оқиғасынан кейін жүзеге асқан.

– Саяси-құқықтық жүйемізді түбегейлі өзгертетін маңызды реформалар сол кезеңде қабылданды. Біз бұл жолы түзетулерді Парламент арқылы емес, бүкілхалықтық референдум арқылы бекіттік. Бұл – демократиялық ұстанымымыздың айқын көрінісі, – деді ол.

Президент атап өткен басты жаңашылдықтардың бірі – суперпрезиденттік басқару моделінен бас тарту. Енді елде «күшті Президент – ықпалды Парламент – есеп беретін Үкімет» қағидаты негізінде басқару жүйесі орнығуда.

Сонымен қатар Тоқаев Қазақстан тарихында алғаш рет Президентті бір реттік, жеті жылдық мерзімге сайлау нормасының енгізілгенін еске салды.

– Бұл тәжірибе ел тарихында бұрын болмаған. Сонымен қатар Президенттің жақын туыстарына жоғары мемлекеттік қызмет атқаруға тыйым салынды. Бұл қадам – билік жүйесін әділ әрі ашық етуге бағытталған, – деді Президент.

Мемлекет басшысы 2022 жылғы бастамаларына күмәнмен қарағандар да болғанын жасырмады. Алайда ол Әділетті Қазақстан құру идеясынан ешкім бас тарта алмайтынын баса айтты.

– Өткенге оралғымыз келмейді. Еліміздің білімді жастары мұндайға жол бермейді. Олар жаңа, заманауи, өркениетті мемлекеттің негізін қалап жатыр, – деді Тоқаев.

Сондай-ақ Президент алдағы Жолдауының негізгі бағыттарына тоқталып, экономикалық және әлеуметтік мәселелерге басымдық берілетінін мәлімдеді.

Шара соңында Мемлекет басшысы еліміздің дамуына үлес қосқан бірқатар азаматқа мемлекеттік және мерейтойлық наградалар табыстады.

Айта кетейік, 1995 жылғы 30 тамызда бүкілхалықтық референдумда қабылданған Конституция бүгінгі таңда Қазақстан Республикасының құқықтық, демократиялық негіздерін айқындайтын басты құжат болып саналады.