Сауатсыз жарнамаға жол жоқ

19.01.23 сағат 12:50 Қосшы жаңалықтары

385

Қосшы қаласында көрнекі ақпарат пен жарнамаға сауаттылықты жолға қою мақсатында қаладағы кәсіпкерлік нысандарында «ҚР тіл туралы», «Жарнама туралы», «Тұтынушылардың құқықтарын қорғау туралы» Заң талаптары бойынша түсіндіру жұмыстары ұдайы жүргізіледі.

2023 жылғы 17 қаңтар күні Қосшы қаласының «Ішкі саясат, мәдениет, тілдерді дамыту және спорт бөлімі» ММ бас маманы мен қалалық тілдерді оқыту орталығының маманы «Нұрай» ТК мен «Лесная поляна» шағын ауданының орталық көшесінде орналасқан кәсіпкерлік нысандарын аралап орын алған қателіктерге байланысты түсіндіру жұмыстарын жүргізді. Қазақстан Республикасының заңнамалық актілерінде өзгеше көзделмесе, хабарландырулар, жарнама, прейскуранттар, баға көрсеткiштерi, ас мəзірлері, нұсқағыштар жəне басқа да көрнекi ақпарат мемлекеттік тілде, қажет болған кезде орыс тілінде жəне (немесе) басқа тiлдерде де орналастырылады. Деректемелер мен көрнекі ақпараттың барлық мəтiнi мынадай ретпен: мемлекеттiк тiлде - сол жағына немесе жоғарғы жағына, орыс тiлiнде оң жағына немесе төменгi жағына орналасады, бiрдей өлшемдегi əрiптермен жазылады. Қажеттiгiне қарай деректемелер мен көрнекі ақпараттың мəтiндерi қосымша басқа да тiлдерге аударылуы мүмкiн. Бұл жағдайда қарiп өлшемi нормативтiк құқықтық актiлерде белгiленген талаптардан аспауға тиiс. Түсіндіру жұмыстарының мақсаты осы саладағы кемшіліктерді түзетуге, маңдайшалардағы орфографиялық және стилистикалық, пунктуациялық қателерге жол бермеуді, республика аумағында тіл туралы заңның орындалуына атсалысу. Қала тұрғындарын көрнекі ақпаратта жіберілген қателіктерді байқаған болсаңыз, өзіңіздің әлеуметтік желідегі парақшаңызға нақты мекенжайын көрсете отырып #КөрнекіАқпаратҚосшы2023 хештегімен белгілеп суретін жүктеуіңізді сұраймыз.