Щучинскідегі жарылыс: тағы екі адам ұсталды

"Центр плова Loft" кафесіндегі жарылысқа кінәлі деген күдікпен тағы екі адам ұсталды, деп хабарлады Ақмола облысы прокуратурасының сайты.

"Осы жылдың 20 сәуірінде арнайы прокурорлар автомобиль газ құю станциясының директорын, сондай-ақ газ баллондарды жеткізушіні ұстады. Олар баллондарды толтыру және жеткізу бойынша қызметтер көрсету кезінде заңнама талаптарын бұзды деген күдікке ілінді", - деп жазылған хабарламада.

Күдіктілердің әрекеттері Қазақстан Республикасы Қылмыстық кодексінің 306 - бабының 3-бөлігі бойынша (абайсызда екіден көп адамның ауыр зардаптары мен өліміне әкеп соққан, тұтынушылардың өмірі мен денсаулығы қауіпсіздігінің талаптарына сай келмейтін қызметтер көрсету) сараланды. Аталған бап санкциясы 8 жылға дейінгі мерзімге бас бостандығынан айыру түріндегі жазаны қарастырады. 

"Күдіктілердің біріне қамауда ұстау, екіншісіне үй қамағына алу түріндегі бұлтартпау шарасы таңдалды", - дейді прокуратура.

Еске сала кетейік, бұған дейін дәмхананың иесі ұсталған болатын. Жарылыстан 9 адам көз жұмды. Сотқа дейінгі тергеу жалғасып жатыр.