Тоқаев қандастар туралы неге қатты айтты?

«Олар бұрын өздері тұрған елде биліктің талабын сақтап, ондай әрекет жасаған жоқ қой?!»

 JANABASTAU.KZ интернет-ресурсының хабарлауынша, Мемлекет басшысы Қасым-Жомарт Тоқаев марқұм Шерзат Болаттың қазасына қатысты пікір білдірді.

Бұл туралы Ана тілі басылымына берген сұхбатында айтып берді. Президент елімізде "Заң мен тәртіп" қағидаты мызғымастай орнығуға тиіс екенін айтты. “Мен Талғар оқиғасына дейін жариялаған Жолдауымда құқық қорғау органдарынан қылмыс пен қарақшылықтың тамырына балта шабуды талап еттім. Қаңтар оқиғасы кезіндегі жаппай тәртіпсіздікті қылмыстық топтар жасағанын естен шығармаған жөн. Мемлекет ұйымдасқан қылмыспен ымырасыз күрес жүргізуге шамасы жететінін соңғы екі жылда анық көрсетті. Аса қауіпті қылмыстық топтар әшкереленіп, құрықталып жатыр. Олардың сыбайластары мен қаржы көздері де анықталып отыр. Былтыр 246 адам қылмыстық жа­уапкершілікке тартылды. Оның ішінде ұйымдасқан қылмыстық топтардың 30 басшысы бар. Бұл жұмысты мен ерекше бақылауда ұстап ­отырмын”, – деді Тоқаев.

 Сондай-ақ президент Талғардағы оқиғадан кейін құқық қорғау органдары қажетті шаралардың бәрін қабылдады дейді. “Күдіктілер қамауға алынды. Тергеп-тексеру жұмыстары аяқталуға жақын. Көп ұзамай осы іске қатысты сот болады. Бұл оқиғаға орай құзырлы органдар қабылдаған барлық шара заң талаптарына толық сай келеді. Ал басқаның бәрі – құр дақпырт пен теріс пиғылды кейбір топтардың осы жағдайға саяси сипат беруге деген ұмтылысы ғана. Бұған жол беруге болмайды”, – деді президент.

Мемлекет басшысы Отанына оралғандар Қазақстанның заңдарына қатаң бағынуы тиіс дейді. “Осы оқиғаға қатысы бар азаматтар бойынша мына мәселені еске салғым келеді. Қазақ халқы шетелден келген отандастарын "қандасым" деп, құшақ жая қарсы алды. Тарихи Отанына оралғандар Қазақстанның заңдарына қатаң бағынып, қоғамдық тәртіпті сақтап, заңсыз әрекеттерден аулақ болуы керек.

 Олар бұрын өздері тұрған елде биліктің талабын сақтап, ондай әрекет жасаған жоқ қой?!”, – деді Тоқаев.