Тұрғындардың басым көпшілігі тұрмысын жайлы деп санайды

29.09.23 сағат 01:14 Саясат

6198

Қосшы қаласының әкімі Гайдар Қасенов әдеттегідей аппарат кеңесін өткізіп, қоғамның ағымдық мәселелерін талқылап, жауапты лауазымды тұлғаларға тиісінше тапсырмалар берді. Аталған жиында «Котельная АСИ» ЖШС директоры Нұрсұлтан Қасымов орталық қазандықтың қысқы жылу беру маусымына дайындығы туралы есеп беріп, Ішкі саясат, мәдениет, спорт және тілдерді дамыту бөлімінің басшысы Айнагүл Көңбай өз саласы бойынша атқарылған жұмыстары мен алдағы міндеттері жөнінде баяндама жасады. Қала әкімінің баспасөз хатшысы Ардақ Зұлқажапқызы әлеуметтік желілерде тұрғындармен кері байланыс орнатудың жай-күйі жайында әңгімелеп берді. «Қыс шанаңды жаз сайла» демекші, Гайдар Қабдоллаұлы қала 2021-2022 жылдардың жылу беру маусымын күрделі қиындықтарсыз жақсы өткізгенін, биылғы қыстың қамына да ойдағыдай әзір болу керектігін қадап айтты. Сондай-ақ шаһарды жылумен қамтамасыз етіп отырған жүйенің жай-күйімен жете танысты. Естеріңізге сала кетейік, Қосшы қаласының орталық қазандығы 2011 жылы пайдалануға берілген. Мемлекеттік-жекеменшік әріптестік аясында 2015 жылы «Котельная АСИ» ЖШС-ға сенімді басқаруға өтті. Қазандық торабына қосылған абоненттердің жалпы саны – 10 315 тұтынушы, оның 74-і көпқабатты, 167-сі жекеменшік үйлер. Орталық желіге мұнан басқа 3 мектеп, 1 балабақша және 12 әкімшілік ғимараттар қосылған. Серіктестік директоры Нұрсұлтан Қасымовтың айтуынша, қаланың 2023-2024 жылғы жылу беру маусымындағы көмірге қажеттілігі 37 мың тоннаны құрайды. Бүгінде қорда осы қажетті мөлшердің 7 мың тоннасы қордаланған.

– Биыл қазандықтар мен жылу желісін жөндеуге бюджеттен 338 млн теңгеден астам қаржы бөлінді. Оның ішінде үш қазандықтың тозығы жеткен экран құбырлары ауыстырылып, экономайзерлерге жөндеу жасалады. Сондай-ақ қазандықтардың бекіткіш арматуралары алмастырылады. 4 желілік сорғылары жөнделіп, түтін шығатын мұржалар жамалып, жаңартылады. Батареялық циклондар мен қырғышты конвейерлер жөнделеді. Екі дана магнитті қоқыс тазартқыш сүзгі тазаланады. Қазандық цехы мен әкімшілік-тұрмыстық кешенге түбегейлі жөндеу жүргізіледі,– деді Нұрсұлтан Дулатұлы.

Одан бөлек, қосалқы жабдықтардың түтінтартқышына, үрлегіш желдеткіштеріне, ауа жылытқышқа жөндеу жасалып, қазандық қаптаулары, конвейер таспалары, үгіткіш балға, тізбекі торлар, толықтырулық сорғы, су жинайтын бактар қалпына келтірілетін болады. Сондай-ақ жылу тораптары бойынша атқарылатын жұмыстар ат-көпір. Аталған жұмыстардың бәрі жөндеу мен қалпына келтіруге арналған шаралар. Қосшы қаласының басшысы Гайдар Қасеновтың айтуынша, қазандықтарды толықтай модернизациялау үшін 9,5 млрд теңге қажет екен.

– Қаламыз жеделдетіп өсіп келеді, бұл тұтыну көлемін ұлғайта түседі, сондықтан осы жайды ескере отырып, тұрғындарды болашақта жылумен, электр энергиясымен, газбен және сумен қамтамасыз етудің кешенді жоспары қала дамуының Бас жоспарына енгізілген,– деп әкім мәселенің мән-жайын аша түсті.

Өздеріңіз бағамдау үшін айта кетейік, мамандардың пікірінше, бір қазандықты түгелдей ауыстыру үшін бақандай 1 жыл уақыт кетеді екен. Сондай-ақ Гайдар Қабдоллаұлы жекеменшіктің 600 млн теңге қаржысына салынып жатқан мешітті тұтастай инженерлік желімен қамту керектігін жеткізді.

Келесі баяндамашы Ішкі саясат, мәдениет, тілдерді дамыту және спорт бөлімінің басшысы Айнагүл Көңбай қалада қоғамдық-саяси жағдай тұрақты екенін айта келіп, жыл басынан бері бейбіт митинг өткізуге 6 өтініш келіп түскенін, өтініш берушілермен түсіндіру жұмыстары жүргізілгенін жеткізді. Тұрғындардың әлеуметтік-саяси көңіл-күйін зерттеу үшін күн сайын әлеуметтік желілерде мониторинг жасалады. Қала тұрғындарын, әсіресе электр энергиясының жиі өшуі, тариф мәселесі, ауыз су, көше жарықтары, жол құрылысы, қоқыстың уақытылы шығарылмауы сияқты сұрақтар жиі мазалайды екен. Жыл басынан еңбек жанжалы тіркелген жоқ.

– Жыл басынан бері БАҚ-та және әлеуметтік медиада 170 жағымсыз жарияланым шықты. Оның ішінде ең көп көтерілгені – тұрғын үй коммуналдық шаруашылығына қатысты. Этносаралық қатынастарды нығайту бойынша жоспарлы жұмыс жүргізілуде. Жыл басынан бері нақты осы бағытқа арналып 25 іс-шара өткен. Әйелдер істері және отбасылық-демографиялық саясат жөніндегі жұмыс тобының үш отырысы ұйымдастырылып, мұнда бүгінгі күні өзекті болып отырған мәселелер қаралды,– деді Айнагүл Көңбай.

Бірінші жартыжылдықта Қосшы қаласындағы қоғамдық-саяси жағдайды талдауға арналған сауалнама нәтижесіне сүйенсек, тұрғындардың 83%-ы әлеуметтік-саяси жағдайды қолайлы деп сипаттаған. Сауалнамаға қатысқандардың 77%-ы мемлекеттік органдардың қызметін жақсы бағалаған, 80%-ы билік өкілдеріне сенетіндіктерін көрсеткен. Тұрғындар 89% Қосшыдағы өмірді Қазақстанның басқа аймақтарына қарағанда «жақсы» деп санаса, 11%-ы «нашар» деп есептеген. Протестік әлеуетке келетін болсақ, 2% тұрғындар тұрғылықты өңірдегі наразылық акцияларының ықтималдығына жол беруі мүмкін деген ниетте, 17% жауап беруге қиналды, 81% наразылық акцияларының ықтималдығына жол бермеймін деп жауап берген. Бұндай әлеуметтік сауалнамалар Ақмола облыс ішкі саясат басқармасымен тұрақты түрде өткізіліп тұрады. Сондай-ақ биылғы жылдың төртінші тоқсанында қалалық ішкі саясат бөлімінің тапсырысы бойынша көлемді сауалнама жүргізілетін болады. Қалалық бюджеттен бөлінген сома 700 000 теңге. Қазір конкурстық рәсімдер жүріп жатыр

Айнагүл Көңбайдың айтуынша, қаланың мәдениет саласында 36 адам жұмыс істейді. «ArtSport» мемлекеттік шығармашылық тапсырыстарды жан басына шаққандағы қаржыландыру бағдарламасы бойынша 10 мекеме тіркеліп, 2 450 бала қатысады. Шығармашылық бағыты бар,ақылы жеке білім беру бойынша 20 орталық қызмет көрсетеді. Мәдениет үйінде 9 үйірме жұмысын жүргізіп жатыр. Қосшы қаласында 2023 жылдың қаңтар-қыркүйек аралығында 33 250 өнерпаздың қатысуымен 90 іс-шара өткізілген. Қосшылықтар екі жыл қатарынан «Ақмола жұлдыздары» облыстық көркемөнерпаздар байқауынан бас жүлде алып, екі автокөлік иеленді. Мәдениет үйінің «Алтын перне» этно-фольклорлық ансамблі «Жас жұлдыздар» және «IQ STAR» V республикалық балалар мен жасөспірімдер байқауларында бас жүлде жеңіп алды. Сұлтан Бейбарыстың 800 жылдығына, Абылай ханның 310 жылдығына және Ақан Серінің 180 жылдығына арналған «Жас батыр – 2023» облыстық ер балалар байқауында «Қосшы театр» актерлік шеберлік үйірмесінің өнерпаздары: Бахтияр Естияр – бас жүлде, ал Садық Хамза 3 орын иегерлері атанды. Ұлытау облысы, Жәйрем қаласында Қазақстан Республикасының еңбек сіңірген қайраткері, халық әртісі, дарынды әнші Манарбек Ержановтың 122 жылдығы аясында І Республикалық дәстүрлі әншілер байқауында Біржан Айтахмет жүлделі ІІІ орынға және қаржылай сертификатқа ие болды. Көкшетау қаласында өткен Жеңіс күніне арналған «Ұрпаққа ұран болған ұлы Жеңіс» атты облыстық әскери әндер байқауында Әлімхан Дінмұхамед ІІ орынға ие болды. «Ән қанат» балалар хоры Алматы қаласында өткен халықаралық «Күншуақ» фестиваль-байқауында І орынды жеңіп алды. Ұлытау облысы, Жезқазған қаласында Республикалық ХХХІ дәстүрлі «Ұлытау үні» фестивалі аясында өткен ақын, термеші Шынболат Ділдебаевтың шығармашылығына арналған термешілер байқауына Елбол Қуанбек І орынды еншіледі. Бұқар жыраудың 355 жылдығына арналған «Даланың жыр шежіресі» облыстық жыршы-термешілер байқауында термеші, жыршы Айтжан Райымбек ІІ орынды иеленді. Иә, өткен жыл қосшылық өнерпаздар үшін олжалы болды, көптеген республикалық-облыстық өнер сайыстарының жүлдегерлері атанды. Ал биылғы жылдың өнер табысы одан да асып түсті. Одан бөлек, «Мерейлі отбасы» ұлттық конкурсынан облыстан Гран-При алып, Ақмола облысының атынан республикалық деңгейге қатысты. Ақмола облысының тіл жанашыры сыйлығын екі адам иеленді: үздік өлкетанушы Ардаби Мәулетұлы, білім беру саласы бойынша «Балдәурен-Сан» балабақшасының меңгерушісі Гүлжахан Олжабаева, үздік қазақтілді блогер ретінде Сымбат Құрманбаева арнайы алғыс хат алды. Сондай-ақ «Туған жер тарихы» байқауында Ақмырза Аяжан (Тайтөбе мектебі) бірінші орынды иеленді. Қалалық кітапханада жыл басынан бері 300-ге жуық іс-шара ұйымдастырылды. Ақын Олжас Қасымның, Айзада Рахымжанованың, алаштанушы Ұшқын Сәдірахманның, профессор Мақсат Алпысбестің қатысуымен кездесулер ұйымдастырылды. Қалалық кітапхана биыл «Қазақтану» облыстық байқауында бірінші орынды жеңіп алды.

– Қалада биыл алғашқы рет «Жасыл ел» жобасы іске асырылды. Ол үшін жергілікті бюджеттен 5 320,0 мың теңге ақша бөлінді. Еңбек жасағында 12 шілде -12 қыркүйек аралығында жалпы саны 66 адам еңбек етті. Жастар ресурстық орталығының кадрлық әлеуетін күшейту, оның ішінде жұмыскерлердің жалақысын арттыру мақсатында Қосшы қаласында Ақмола облысында бірінші болып Жастар ресурстық орталығының қызметкерлеріне шілде айынан бастап 50 пайыздық жалақы үстемесі қосылды,– деді Ішкі саясат жетекшісі.

Бөлім басышысы А.Көңбай сондай-ақ көше атауларын қазақыландыру, мемлекеттік тілде оқыту, қалада спортты дамыту, діни тұрақтылық және білім беру салаларына қатысты ой-пікірімен бөлісті. Өз кезегінде әлеуметтік желілерде тұрғындармен кері байланыс орнату жайында мәселе көтерген әкімнің баспасөз хатшысы Ардақ Зұлқажапқызы сөзін Президент Қасым-Жомарт Тоқаевтың 2019 жылғы Жолдауында айтылған «Халық үніне құлақ асатын мемлекет» туралы тұжырымдамасын мысалға ала отырып бастады.

– «Халықпен және бизнеспен тиімді коммуникация жүйесін орнату керек. Әр орталық және жергілікті атқарушы органда азаматтармен тікелей және кері байланыс орнату үшін тұрақты алаңдар жұмыс істеуі тиіс. Әлеуметтік желі жұмысына ерекше көңіл бөлу қажет. Әр мемлекеттік қызметкер әлеуметтік желіде өз саласы бойынша белсенді болуы керек,– дей келе, былай деп жалғастырды. – Мемлекет басшысының аталған тұжырымдамасынан кейін мемлекеттік органдар әлеуметтік желілерде ресми аккаунт ашып және басшылардың жеке байланыс телефондарын жариялау арқылы халықпен жедел кері байланыс орнату жолға қойылды. Мұны халыққа қызмет көрсетудің, жұртшылықпен байланыс орнатудың озық үлгілерінің бірі деуге болады. Бұл атқарушы билік өкілдерінің халықпен қарым-қатынасы айтарлықтай ілгерілегенін көрсетеді. Қоғаммен диалог орнатуға зор үлес қосып келеді,– деді баспасөз хатшысы А. Зұлқажапқызы.

Осыған орай, Қосшы қала мәртебесін алғалы барлық мемлекеттік мекемелердің және бағынышты ұйымдардың әлеуметтік желілердегі ресми парақшалары ашылды және Қосшы қаласы әкімдігінің сайты бар. Сайт пен парақшаларда күнделікті ресми ақпараттармен бірге, Қосшы қаласының әлеуметтік - экономикалық даму көрсеткіші және жасалып жатқан жұмыстардың нәтижесі бойынша да ақпараттар салынып келеді. Оған жауапты мамандар белгіленген. Жауапты мамандар ортақ бір чатқа қосылды топта қажетті ақпараттармен қамтамасыз етіледі. Жұмыстың нәтижелі жүруіне және мониторинг жасалып, қадағалап отыруға Қосшы қаласы әкімдігінің ішкі саясат бөлімі мен Қосшы қаласы әкімінің кеңесші-баспасөз хатшысы жауапты.

– Өткен жылы әлеуметтік желі арқылы түскен теріс бағыттағы сұрақтарға жауап беру бойынша облыстан жасалған мониторинг нәтижесінде, Қосшы қаласында кері байланысқа шығу 89 % нәтижені көрсетсе, биыл бірде бір сұрақ жауапсыз қалған жоқ. Нәтиже 100 %,– деді баспасөз хатшысы.

Бұдан бөлек, 2021 жылдың 9 қыркүйегі күні Қосшы қаласы әкімдігінің ресми чаты ашылған. Чатқа қала әкімінен бастап, барлық мемлекеттік мекеме басшылары мен мамандары, бағынышты ұйым басшылары, мердігер мекемелердің өкілдері және белсенді тұрғындар қосылған. Чатты ашудың басты мақсаты – Қосшы қаласының инфрақұрылымына, тұрғын алаптардың мәселесіне, яғни су, жылу, электр қуаты, көше тазалығы, ит аулау, абаттандыру және көлік қатынасы, автомобиль жолдарына қатысты туындаған кез келген сұраққа бірден кері байланысқа шығып, сауал жолдаушыға тиісті ақпаратпен тез арада жауап беріп, «еститін үкімет» қағидасына сай болу. Қосшы қаласы әкімдігінің ресми тобында ереже бойынша саясат талқыланбайды, сағат түнгі 22.00-ден кейін тек төтенше жағдай болса ғана жазуға рұқсат, сенбі, жексенбі күндері топта тек әкімші ғана ақапарат тарата алады. Ал түнгі уақытта немесе демалыс күндері тұрғындар тарапынан қандай да бір сұрақ туындаса, әкімшіге жеткен кез келген ақпарат бірден қала әкімінің орынбасарлары, аппарат жетекшісі, мемлекеттік мекеме басшылары, құзырлы органдар мен мердігер мекеме өкілдері қосылған топ, яғни жедел штаб чатына жолданып, туындаған жағдайға қатысты кері байланыс орнатылып, тиісті шара қабылданады. Күнделікті ақпарат алмасу мақсатында мұндай чат Тайтөбе ауылында да ашылған. Осы тұрғыдан алғанда, әлеуметтік желі арқылы түсетін сұрақтарға дер кезінде жауап берілмей, өзара түсінбеушілік туындап жататын кездер де болады. Жауапсыз, назардан тыс қалған бір сұрақ, келесі мың сұрақты туғызатынын естен шығармауға тиіспіз. Ал кез келген туындаған сұраққа неғұрлым тез жауап беріліп, әрі сапалы кері байланыс орнатылса, соғұрлым тұрғындар арасындағы наразылық пен түсінбеушілік бәсеңдеп, жағдай ушықпай, бақылауда болатынын ескерген жөн.

– Қосшы қаласына түрлі БАҚ өкілдері де жиі бас сұғады. Себебі, Қосшы облыстық маңызы бар қала! Және қоныстанушылардың саны күн санап артып келеді. Ең алдымен, журналистер тарапынан қойылатын сұрақтар қаланың инфрақұрылымына қатысты. Ондай сәтте, қала әкімінің орынбасарлары мен бөлім басшылары тілші тарапынан қойылған сұрақтарға толыққанды жауап береді, – деді А. Зұлқажапқызы.

Дәулет АСАУ