«Ұршық Party»: ұлттық өнер сайлау күнінің ерекше көрінісіне айналды

Өңірде сайлау күні ұлттық дәстүрді дәріптейтін ерекше «Ұршық Party» акциясы ұйымдастырылды. Шара барысында қатысушылар қазақ халқының тұрмысында маңызды орын алған ұршық иіру өнерін көрсетіп, өзіндік рекорд орнатуға талпынды, деп хабарлайды Өңірлік Коммуникациялар қызметінен.

Ұршық – халқымыздың тұрмыс-тіршілігімен біте қайнасқан дәстүрлі қолөнердің бірі. Бұрын әжелер мен аналар жүн иіріп, одан күнделікті өмірге қажетті түрлі бұйымдар дайындаған. Бүгінде бұл өнер ұлттық мәдени мұраның бір бөлігі ретінде қайта жаңғырып келеді.

Акцияға сайлау учаскесіне келген тұрғындар да белсенді қатысып, ұршық иірудің қыр-сырын тамашалады. Әртүрлі жастағы азаматтардың басын қосқан шара ұлттық өнерді насихаттап қана қоймай, аға буынның тәжірибесін кейінгі ұрпаққа жеткізудің өзіндік алаңына айналды.

«Ұршық – жай ғана тұрмыстық құрал емес, ол халқымыздың еңбекқорлығын, шеберлігін және ұрпақтан-ұрпаққа жалғасқан дәстүрін көрсететін ұлттық мұра. Бүгінгі шара арқылы осы өнерге деген қызығушылықты арттырып, ата-бабадан қалған құндылықтарды заманауи форматта жаңғыртуды мақсат еттік», – деді акцияға қатысушылар.

«Ұршық Party» қатысушыларының белсенділігі сайлау учаскесінде ерекше көңіл күй қалыптастырды. Ұлттық өнерді заманауи форматта таныстырған бастама сайлау күнінің есте қаларлық сәттерінің біріне айналды.

Бұл шара ұлттық дәстүрдің уақыт өткен сайын өзектілігін жоғалтпайтынын көрсетті. Керісінше, оны жаңа форматта ұсыну арқылы кейінгі ұрпақтың қызығушылығын оятып, халқымыздың мәдени мұрасын дәріптеуге мүмкіндік бар.