Ақмола облысында су тасқынынан зардап шеккен жолдар қалпына келтірілді

Ақмола облысында республикалық және жергілікті маңызы бар автожолдарды тасқын су басқан. Осындай 141 жағдай тіркелген. Су тасқыны салдарынан жергілікті маңызы бар 40-тан астам автомобиль жолдары қираған. Бұл туралы Ақмола облысының жолаушылар көлігі және автомобиль жолдары басқармасы басшысы Владимир Кулаков журналистермен өткен брифингте мәлімдеді, деп хабарлайды Өңірлік коммуникациялар қызметінен. 

Владимир Кулаковтың айтуынша, өңірде су тасқыны салдарынан үш көпір қираған. Яғни, «Жалтыр-Макинск», «Қыйма-Терсаққан» жолдарында және Б.Әшімов көшесіндегі Көкшетау қаласындағы көпір зақымданды. Қосымша «Ақмол-Нұресіл-Талапкер» учаскесінде жаңа көпір салу қажет.

Дегенмен, ауқымды қиратуларға қарамастан, жолдар мен инфрақұрылымды қалпына келтіру жұмыстары белсенді жүргізілуде. Атап айтқанда, жолдардың 15 проблемалық учаскесі ішінара қалпына келтірілді, ал толық жөндеуді жүзеге асыру үшін Үкіметтің резервтік қорынан 4,8 млрд теңге көлемінде қаражат бөлінді. Бұл Астрахан, Атбасар, Есіл және Жарқайың аудандарындағы, сондай-ақ Көкшетау қаласындағы бүлінген жолдарды қалпына келтіруге мүмкіндік берді.

«Су тасқыны кезеңіне дайындық барысында біз ескі құбырларды ауыстыруды және жаңаларын орнатуды қоса алғанда, инфрақұрылымды нығайту жөніндегі іс-шаралар кешенін орындадық. Бұл жолдар мен көпірлердің су тасқыны жүктемелеріне тұрақтылығын едәуір арттырды», - деді Владимир Кулаков.

Қазір барлық жолдар қалпына келтіріліп, болашақта су тасқынының салдарын азайту үшін инфрақұрылымды жөндеу және жаңғырту жұмыстары жалғасуда.

Еске салайық, биыл көктем айларында Қазақстанның солтүстік аймақтары су тасқынының салдарынан қатты зардап шеккен еді. Оның ішінде Ақмола облысы жыл сайын көктемгі су тасқынының салдарымен бетпе-бет келеді, қардың еруі мен мол жаңбыр өзендер мен бұлақтардың толып кетуіне әкеледі. Осы жылы су тасқыны әсіресе қиынға соқты. Оның салдары аймақтың 40-тан астам жолдары мен бірнеше көпірлеріне әсер етті. Өңірдегі су тасқыны проблемалары жаңалық емес екені анық. Жыл сайын облыс инфрақұрылымды жаңғыртуға және ықтимал төтенше жағдайларға дайындыққа көбірек көңіл бөліп келеді.