Дені сау бала ауруханадан мүгедек болып шықты ма?

Жамбыл облысының Меркі аудандық ауруханасында даулы жағдай тіркелді. Әлеуметтік желіде тараған мәліметке сәйкес, қан алу кезінде медбикелердің әрекетінен сәбидің қолы сынған болуы мүмкін, деп хабарлайды janabastau.kz. 

Баланың анасының айтуынша, ұлы 4 тамызда ішек инфекциясымен ауруханаға жеткізілген. Бір апта бойы әртүрлі анализдер алынып, ем жүргізілгенімен, денсаулығында айтарлықтай өзгеріс болмаған. Ал 11 тамыз күні түстен кейін екі медбике қан алмақ болып, баланың қолын қатты қысқан. Соның салдарынан сүйегі шытынап кеткенін ата-ана алға тартып отыр.

«Дені сау баланы ауру қылды. Алғашқыда өте көңілді, ойнақы болып келген ұлым қазір күле алмайды, ойыннан қалған», – дейді анасы.

Бұл оқиға әлеуметтік желіде үлкен талқыға түсті. Көпшілік дәрігерлердің кәсіби біліктілігін сынға алып, «жауапсыздықтың салдары» деп бағалауда.
– «Не деген сауатсыздық! Шаш ал десе, бас алатын мамандар!» – деп жазды пікір қалдырушылардың бірі.
– «Меркі ауруханасына барсаң, тірі шықпайсың. Өміріңнен түңілгің келсе ғана бар», – деп ашынған тағы бір тұрғын.

Дегенмен, кейбір қолданушылар бұл ақпараттың шындыққа жанаспайтынын айтып, «ешқандай сыну болмаған» деп дәрігерлерді қорғап шықты.

Қазір бұл жағдайға байланысты ресми органдардың түсініктемесі күтілуде. Ал ата-ана болса, баласының денсаулығына алаңдап, «мүгедек болып қала ма» деп қорқып отыр.