Германияда Астана сотының бұрынғы судьясы жоғалып кетті: СІМ пікір білдірді
225
Сурет: ашық дереккөзден
Сыртқы істер министрлігінің ресми өкілі Айбек Смадияров Германияда Қазақстан азаматы жоғалғанын растады,- деп хабарлайды Janabastau.kz.
Майндағы Франкфурттің жергілікті полициясы бір апта бұрын жоғалып кеткен Астананың Сарыарқа ауданының бұрынғы судьясы Айгүл Сайлыбаеваны іздестіріп жатыр. Смадияров Сайлыбаеваның ұзақ уақыт бойы Қазақстаннан тыс жерде тұрып жатқанын айтты. Ол жоғалып кеткеннен кейін оның туыстары Майндағы Франкфурт қаласындағы Қазақстан бас консулдығына хабарласты
«2024 жылғы 5 маусымда Майндағы Франкфурт қаласындағы Қазақстанның бас консулдығына Қазақстан азаматтарынан 2024 жылғы 3 маусымда қызының жоғалып кетуіне байланысты арыз түсті. Бас консулдық бұл мәселені ерекше бақылауға алды. Біздің дипломаттар дереу жергілікті полицияға хабарласты, олар іздеу жұмыстарын бастап кетті. Консул Сайлыбаеваның тұрғылықты мекен-жайына барып, оның туыстарымен кездесіп, жағдайды полициямен талқылады, олар бұл іске ерекше назар аударуға уәде берді. Сондай-ақ Берлиндегі Бас консулдық пен Елшілік аталған мәселені бақылауда ұстау үшін Германияның Сыртқы істер министрлігіне тиісті үндеу жолдады»,- деді Смадияров.
Ол сондай-ақ дипломаттар жоғалған әйелдің туыстары Германияға баруға виза алуды тездету үшін жұмыс істеп жатқанын айтты. Консул отбасымен байланыста. Оның айтуынша, Германия заңына сәйкес қылмыстық істің мән-жайы жария етілмейді.
«Сондай-ақ, Қазақстан тарапының іске тікелей араласуға құқығы жоқ. Дипломаттар жоғалған әйелдің туыстарымен тікелей байланысты. Қазір неміс тарапына бұл істі жеке бақылауға алу және барлық қолғабысты көрсету туралы арнайы хат жолданды. Жақын арада неміс тарапымен бірлесіп, (жоғалған әйелдің) туыстарына виза алып беру үшін жұмыс істеп жатырмыз», — деді Айбек Смадияров СІМ-де өткен баспасөз мәслихатында.
Журналист Гүлмира Әбіқайдың айтуынша, Сайлыбаеваның телефоны сөндірулі. Күйеуі оның қайда екенін білмейтінін айтты.
Пікірлер (0)