Көкпарда бәсіміз биік пе?

V Дүниежүзілік көшпелілер ойыны әне-міне басталғалы тұр. Көп қазақтың Париж олимпиадасындағы спортшылардың нәтижесіне қарап көңілі қалғаны да рас, жеңімпаздардың шыққан биігіне рақмет айтып, көңіл жұбатқандары да бар. Ұлттық рухымызды көтеретін, намысымызды шыңдайтын, қанды қыздыратын көкпар мен теңге ілу секілді ұлттық ойындардың Олимпиадаға енбейтінін өкінішпен айтып, әзіл-шыны аралас пікір білдіргендер де болды.  
Қазақ үшін нағыз дода енді басталмақ. Өйткені Дүниежүзілік көшпелілер ойынында қанша ғасырдан бері қанға сіңген ұлттық спорт түрлері сарапқа түспек. Осы аламанға қатысу үшін әрбір спорт түрінен, бірнеше сатылы іріктеуден өткен, «сүт бетіндегі қаймақтары» таңдалды, деп жазды Элеонора Әзіржан.

Еске сала кетейік, V Дүниежүзілік көшпелілер ойынына әлемнің 85-тен аса елінен 2 мыңнан аса спортшы қатыспақшы. Өкініштісі, осындай аламан біздің елде өтетініне қарамастан, қазақстандықтардың 41 пайызы ғана Көшпелілер ойынынан хабардар екен. Қоғамдық саясат институты шілде айында өткізген сауалдамаға қатысқандардың 41,4 пайызы ғана биыл Астанада әлемдік деңгейдегі дода өтетінін білетін болып шыққан. Ойынды тамашалауға Астанаға 100 мыңға жуық турист келеді деген болжам бар. 21 спорт түрі бойынша барлығы 97 медаль сарапқа салынатын додадағы ұлттық спорт ойын­дарының ең көбі ат үстіндегі жарыстар: көкпар, көк бөрі, жамбы ату, теңге ілу, бәйге, аударыспақ. Сондықтан біздің үміт – ат спорты, оның ішінде көкпардан алар бәйге. 

 «Кішкентайымнан ауылда тай мініп өстік. Атқа өте жақын болдым. Көкпарды осылай жаныма жақын тұтып кеттім. Әкем, атам көкпаршы болған. Қызығушылық қанда бар шығар. Жастар мен ересектер арасында Қазақстанның 3–4 дүркін чемпионымын. Былтыр Түркиядағы Көшпелілер ойынында да чемпион болдық. Қазір жарысқа жігіттер де, аттар да дайын. Алдағы мақсат Көшпелілер ойынында чемпион болып, еліміздің туын көкте желбірету. Сол үшін жылдың басынан бері, бұ­йырса, чемпион боламыз деп дайындалып жатырмыз. Көкпар – ұлттың жаны, ұлттың намысы, жігері. Ендеше, осынау бір ойын түрінен біздің топ кейін қалуы өзімізге сын болмақ», – дейді Көкпардан ұлттық құрама спортшысы Айнабек Бердіқұл.

Асық – ұлттық спорт ұмытыла бастаған кешегі Кеңес билігі тұсында да балалардың сүйікті ермегі болған ойын түрі. Көне Мысыр пирамидалары табылған қала жұртының өзінде де перғауын қабірінен шыққан асық түріне қарап, бұл ойынның тамыры терең, философиясы сан қатпарлы екенін түсінуге болады. Асық атудан да ел спортшылары бәйге алады деген үміт мол.  

«Асық атумен 2017 жылдан бастап, яғни жеті жылдан бері айналысамын. Қазақстан чемпионымын, кубоктың екі дүркін жеңімпазымын. Осы саладағы ең үлкен қатысайын деп жатқан жарысым V Дүниежүзілік көшпелілер ойыны. Халықаралық сайысқа сақадай саймыз. Ойынға өте аз уақыт қалды. Ел намысын қорғауға дайындық өте жоғары деңгейде. Асық атудан ел құрамасы жасақталарда Алматыда 10 күндік оқу-жаттығу ойыны болды. Сол жерде 17 адамның арасында іріктеу өтіп, ең мықты дегендері құрамаға алынды. Жақын арада Көкшетау қаласындағы 11 күндік оқу-жаттығу жиынына барып келдік. Намысты додада басты қарсыластарымыз Қырғызстан, Тәжікстан мемлекеттері. Өйткені оларда да асық ату спорты дамыған, өте жақсы ойнайды. Солармен сайысуға қызу дайындық үстіндеміз», – дейді Асық атудан Қазақстан ұлттық құрама спортшысы Айбек Амангелдіұлы.

Ал Асық атудан Қазақстан ұлттық құрама спортшысы Көгершін Ардаққызы пікірін былай білдірді: «Зеренді ауданы Ортаағаш ауылының қызымын. Қазіргі кезге дейін мен  Әлем кубогының чемпионы, Еуразия кубогының күміс жүлдегері және  ел кубогының бірінші жүлдегерімін. Асық атуды анам үйретті. Одан соң ауылдағы дене шынықтыру пәнінің мұғалімі мені жарыстарға қатыстыра бастады. Содан қызығушылығым артып, қазіргі кезде мені Асық атудан аға бапкер Самат Әукенов осы жарысқа дайындап жүр. Алдағы мақсаттарымның бірі асықты әлемдік деңгейге шығарып, көк туымызды желбіреткім келеді. Ерекше ойын болғандықтан, өзіме қатты ұнайды. Құрамадағы қыздармен бірінші орын алуға тырысып жатырмыз».