Спорт десе ішер асын жерге қоятын деңгейдеміз

«Тәні саудың жаны сау» деген қазаққа қазір спорттың барлық түрі таңсық емес. Өйткені ел билігі арнайы мемлекеттік бағдарламалар арқылы денсаулық пен спорт саласын жүйелі түрде дамытуға баса мән беріп отыр. Соның арқасында буыны қатып, бұғанасы бекіген саңлақтарымыз халықаралық аренада ел абыройын асқақтата түсті, деп хабарлайды JANABASTAU.KZ ақпарат агенттігі.

Дерекке сүйенсек, былтыр еліміз бойынша 90 спорттық нысан (29-ы қалада, 61-і ауылда) пайдалануға берілген болатын. Ал әлемдік деңгейдегі спорт ғимараттары санының 2023 жылы 43 мыңнан асқаны мәлім. Бұқараның инфрақұрылымға деген сол кездегі қолжетімділігі 50 пайызды қамтыса, ол көрсеткішті 2029 жылға дейін 65 пайызға ұлғайту жоспарланған.

Әлемдік деңгей демекші, бүгінде Түркістан қаласында ескек есу арнасы, Өскеменде үстел теннисі академиясы, Щучьеде шаңғы базасының үшінші фазасы, ШҚО-да жабық стадион мен ірі оңалту орталығының қабырғасы қаланып жатыр. Сондай-ақ алдағы уақытта әлі Астана, Шымкент, Ақтау, Өскемен және Семей қалаларында UEFA стандартына сай 6 стадион салынуға тиіс.

Спорт саласы бойынша 2025 жыл да жеміссіз емес. Атап айтқанда, жыл соңына дейін Ұлттық дене шынықтыру және спорт университетін ашу жоспарланған. Онда студенттерге докторантураға дейін білім беру ісі қарастырылып отыр. Жалпы, ол оқу орны кеңістігіне стадион, олимпиадалық бассейн, жабық жеңіл атлетика манежі, ғылыми-зерттеу және медициналық-сауықтыру орталықтары кіреді.

Ал өңірлерге жеке-жеке тоқталып өтсек, биыл Ақмола облысының Зеренді ауылында мемлекетке қайтарылған активтер есебінен салынған, ауданы 6 мың шаршы метрден асатын үлкен спорт кешені ашылды. Оның ішінде бокс, күрес, ауыр атлетика залдары, медицина кабинеті, массаж бөлмесі, буфет, тіпті, 48 адамдық жатын орны мен кір жуатын бөлмеге дейін бар. Сондай-ақ Павлодар облысының Баянауыл ауданында волейбол, жүзу, күрес, садақ ату, үстел теннисі мен бассейні бар көпфункциялы спорт кешені пайдалануға берілген. Қазір Қызылорда қаласында да халықаралық стандартқа сай жаңа стадионның құрылысы аяқталуға жақын. Сол сияқты, елордада 3 600 жанкүйер сыятын жаңа стадионның іргетасы құйылды. Енді оның игілігін келесі жылдың бірінші тоқсанында көруіміз мүмкін.

Негізінен денешынықтыруға баланы көбірек баулу керек. Бізде ол жағы да ескерілген. Бүгінде елдегі 510 спорт мектебінде 404 мыңнан аса оқушы тәрбиеленіп жатыр. Бұл ретте шыныққан шымырлар қатарына 2022 жылдан бері 13 мың адамның қосылғанын айта кеткен жөн. Осылайша, 2025 жылы Олимпиадалық резервті даярлайтын мамандандырылған мектеп-интернат, колледж түлектерінің үлесі 30 пайызға жеткен. Алдағы 3-4 жылда 35 пайызға дейін арту ықтималдығы бар.

Сөз басында «қазаққа қазір спорттың барлық түрі таңсық емес» дегенді бекер айтқан жоқпыз. Өйткені біз – ежелден қалыптасқан өзіндік ұлттық спорты бар ұлтпыз. Жабық кешені болмаған кең тынысты ата-бабамыз спортпен үнемі ашық аспан астында, жұмыр жердің үстінде, аттың құлағында ойнап жүріп айналысқан. Бүгінде сол дәстүр сабақтастығы үзілмеген Қазақстанда ұлттық спорт түрлерімен жүйелі түрде 670 мыңнан аса адам шұғылданады.

Заманауи спорт түрлерінен де әлем назарын өзіне аудартқан әйгілі саңлақтарымыз аз емес. Мысалы, сала басшылары солардың арқасында ел алдына биыл жыл соңына дейін халықаралық дәрежедегі додалардан кемінде 860 медаль жеңіп алу межесін қойған. Ал 2029 жылы медаль санын 900-ге жеткізуді мақсат тұтып отыр.

Әлемдік деңгейден бөлек, мемлекет өз ішіміздегі бұқаралық спортқа да жақсы көңіл бөліп келеді. Ресми дерекке жүгінсек, қазір 8 миллионнан аса отандасымыз спортты жанына серік еткен. Бұл – халықтың шамамен 41,4 пайызы деген сөз. Жоспар бойынша, осындай қатардағы спортшылар саны 2029 жылға дейін 50 пайызды қамтуға тиіс. Себебі, елімізде жыл сайын бұқараның қызығушылығын оятатын 25 мыңнан аса спорттық іс-шара өткізіліп тұрады. Жақсы көрсеткіш, әрине.

Қорыта айтқанда, қазақ елінде дене шынықтыру мен спортты дамыту ісі заңнамалық жаңғыртулар, кадрларды қолдау мен мамандар даярлау арқылы жақсы жолға қойылған. Міне, саланың сапалы дамуы осылай қамтамасыз етілсек керек!