Медиация жайлы не білуіміз қажет?

Қосшы қаласында 5 тамыз күні қалалық әкімдікте медиаторлар «Ашық есік» күнін өткізіп, азаматтарға ақыл-кеңес берді. Отбасы мүшелерімен, жұмыс берушілермен немесе билік өкілдерімен келіспеушілікте сотқа жүгірудің қажеті жоқ. Мұны «татуластыру» процедуралары арқылы реттеуге болады. Медиация дегеніміз не? Медиация – бұл дауға қатысушыларға өзара қолайлы шешім табуға көмектесетін тәуелсіз медиаторлар көмегімен дауды шешудің балама, соттан тыс әдісі.  Медиацияның мақсаттары: дауды (дау-шарды) шешудің медиацияның екі тарапын да қанағаттандыратын нұсқасына қол жеткізу;  тараптардың дауласушылық деңгейін төмендету. Медиацияны жүргізу қағидаттары:еріктілік; медиация тараптарының тең құқылығы;  медиатордың тәуелсіздігі мен бейтараптылығы;  медиация рәсіміне араласуға жол бермеушілік; құпиялық. Медиация қандай жағдайларда көмектесе алады? Медиация азаматтық, еңбек және отбасылық дауларды реттеу үшін қолданылады. Медиация даудың екі жағына да сәйкес келетін шешім табуға болатын жағдайларда көмектесе алады. Бұл процедура сот талқылауындағыдай дәлелдемелер мен құқықтық ұстанымдар емес, тараптардың мүдделері ескерілетінін болжайды. Медиация әсіресе дауласушылар ұзақ мерзімді қарым-қатынастармен байланыста болған және оларды ең ыңғайлы түрде сақтау немесе тоқтату міндеті қойылған жағдайларда өте маңызды. Мысалы, ажырасқаннан кейін сот баланың тұрғылықты жерін анықтай алады, ал медиация арқылы ата-аналар оны тәрбиелеуге қатысу туралы келісе алады. Медиация рәсімі қалай жүргізіледі? Медиатор тараптарға рәсімнің мәні мен принциптерін түсіндіреді. Содан кейін олардың мәлімдемелерін тыңдайды: дауға қатысушылардың әрқайсысы жанжалды қалай көреді. Тараптар бірлесіп талқылауға дайын мәселелер тұжырымдалады. Содан кейін медиатор тараптардың мүдделерін анықтайды. Қатысушылар шындыққа және әрқайсысының мүдделеріне сәйкес бағаланатын ықтимал шешімдерді ұсынады. Нәтижесінде қол жеткізілген уағдаластықтарды тіркейтін медиативтік келісім жасалуы мүмкін. Татуластыру рәсімін өткізу туралы кім бастама көтере алады? Татуластыру рәсімдері өз еркімен жүргізіледі. Екі тарап та бастама көтеруге құқылы. Сот бітімгершілік рәсімінен өтуді ұсынуы мүмкін, бірақ міндеттемеуі мүмкін. Ол сот процесінің кез-келген кезеңінде жүзеге асырылады. Осы уақытта сот отырысы кейінге қалдырылады. Егер тараптар уағдаластықтарға қол жеткізе алмаса, сот талқылауы қайта басталады.

Жасын Жолмырза