Қауіпсіз Қосшы – есірткісіз ел қалыптастыруға жасалған бір қадам

Есірткіге қарсы күрес – қоғамның тұрақтылығын, ұлттың болашағын қорғауға бағытталған стратегиялық міндет. Соңғы жылдары Қазақстанда, соның ішінде Ақмола облысына қарасты Қосшы қаласында да есірткі қылмысына қарсы іс-қимыл шаралары күшейіп келеді, деп жазады JANABASTAU.KZ ақпарат агенттігі.

Бұл бағыттағы жұмыстар құқық қорғау органдары мен жергілікті қоғамдастықтың өзара іс-қимылына, сондай-ақ жастар арасында профилактикалық түсіндірудің тиімділігіне тікелей байланысты.

Жалпы алғанда, Қосшы – қала мәртебесіне ие болғалы бері қарқынды дамып келе жатқан аймақ. Ал осылайша халық санының күрт өсуі, урбанизация, еңбек миграциясы және бос уақытты тиімді өткізуге арналған әлеуметтік инфрақұрылым жетіспеушілігінің белгілі бір әлеуметтік қауіптерді тудыратыны сөзсіз. Соның бірі – есірткі айналымы мен синтетикалық заттардың таралуы.

Қалалық полиция бөлімінің дерегіне сүйенсек, соңғы бір жыл ішінде Қосшыда есірткіге қатысты бірнеше құқықбұзушылық тіркелген. Олардың ішінде синтетикалық есірткіні интернет арқылы таратқан және «закладка» тәсілімен жасырған деректер бар. Мұндай қылмыстардың артында көбіне ұйымдасқан топтар мен «жастар курьерлері» тұрады.

Бүгінде Ішкі істер министрлігі есірткі бизнесіне қарсы іс-қимылды мемлекеттік саясаттың маңызды бағыты ретінде белгілеп отыр. Сондықтан «Есірткісіз болашақ» республикалық бағдарламасы аясында аймақтарда арнайы мобильді топтар жұмыс істейді.

Атап айтқанда, Ақмола облысында биылдың өзінде 200-ден аса рейдтік іс-шара өтіп, 30 келіден аса есірткі заты тәркіленген.

Қосшы қаласында да осындай іс-шаралар жиі өткізіліп келеді. Мысалы, биыл көктемде қалалық мектептерде есірткіге қарсы ашық сабақтар мен пікірталастар ұйымдастырылды. Құқық қорғау қызметкерлері, педагогтер және ата-аналар қауымдастығы бірлесе отырып, жасөспірімдердің есірткіге еліктеуінің алдын алу жолдарын түсіндірді.

Сорақысы, интернеттің қарқынды дамуымен қатар, соңғы жылдары есірткі бизнесі дәстүрлі тәсілдерден онлайн форматқа көшіп отыр. Енді Telegram-боттар мен өзге де әлеуметтік желілер арқылы жасырын сауда ұйымдастыру, құпия сөз арқылы «жасырын мекенжайлар» қою сияқты тәсілдер құқық қорғаушыларға жаңа міндеттер жүктей береді.

Қазір Қосшы қаласының полиция бөлімі мен ІІМ Киберқылмысқа қарсы орталығы жергілікті интернет кеңістігін бақылауды күшейтіп, жарнама мен сілтеме қалдырушыларды анықтау жұмыстарын белсенді түрде жүргізіп отыр.

Сарапшылардың пікірінше, мұндай киберсауданың алдын алу тек полицияның ғана емес, ата-аналар мен педагогтердің цифрлық сауаттылығына да байланысты. Себебі жасөспірімдер көп жағдайда қауіпті сайттарға ойын немесе «жұмыс ұсынысы» арқылы байланып қалады.

Негізінен бізге есірткі бизнесіне қарсы күресте қоғамның шешуші рөл атқаратынын ескеру қажет. Соны түсінген Қосшы қаласындағы қоғамдық белсенділер, еріктілер мен жастар ұйымдары «Таза болашақ» және «Stop Drugs» акцияларын тұрақты түрде өткізіп келеді. Мұндай шаралар жастардың өз ортасында зиянды әдеттерге қарсы тұруына және жауапкершілік сезімін күшейтуге бағытталған. Сонымен қатар, жергілікті БАҚ пен әлеуметтік желі белсенділері де есірткіге қарсы мәдениетті қалыптастыруға зор үлес қосып отыр.

Әрбір тұрғынның белсенді азаматтық ұстанымы – қаланың қауіпсіздігін сақтаудың кепілі. Есірткімен күрес тек жазалау шараларымен шектелмейтіндіктен, оның қазіргі ең тиімді жолы – алдын алу және ағарту жұмыстары дер едік. Сондықтан да Қосшы қаласында саламатты өмір салтын ұстануға тиіс жастарға арналған спорттық және шығармашылық клубтар, психологиялық кеңес беру орталықтары ашылса, ол игіліктің қоғамдағы әлеуметтік иммунитетті күшейте түсетіні анық. Сондай-ақ есірткіге қарсы күрестің әлеуметтік тірегі деп қала жастарын жұмыспен қамту, мәдени және спорттық шараларды арттыруды зор сеніммен айта аламыз.

Сонымен, сіз бен бізге есірткі бизнесін жою, жастардың болашағын қорғау, ұлттың рухани және дене саулығын сақтау – парыз. Бұл ретте тек қауіпсіз Қосшының ғана емес, жалпы есірткісіз Қазақстанның әр азаматтың жеке жауапкершілігінен басталатынын ұмытпаған абзал.