Қосшы халқының қауіпсіздігі жан-жақты қамтамасыз етілген

Қосшы қаласы – елорда іргесіндегі жас қала және даму динамикасы жоғары аймақ. Осыған орай тыныс-тіршілігі, әлеуметтік жағдайы да белсенді. Көші-қон, құрылыс, инфрақұрылымның жаңаруымен қатар, түрлі мәселе де артып келеді. Солардың ішіндегі ең өзекті бағыттардың бірі – қылмысқа қарсы күрес және қоғам қауіпсіздігін қамтамасыз ету, деп жазады JANABASTAU.KZ ақпарат агенттігі.

Әрине, даму белсенділігі жоғары аймақта әлеуметтік бейімделу қиындықтары, уақытша жұмыспен қамту, жастардың бос уақытын қалай өткізуі мәселелері сияқты кейбір тәуекелдер де бар. Осы тұрғыдан алғанда, Қосшының қылмысқа қарсы күрес жүйесін қарастыру – қаланың тұрақтылығын, азаматтардың қауіпсіздігін қамтамасыз ету үшін аса маңызды.

Жалпы, бүгінде Ақмола облысында қылмыстық құқықбұзушылықтар саны шамамен 21,1% азайған. Ауырлығына қарай жіктеп жеткізсек, аса ауыр қылмыстар 8,7%, ауыр қылмыстар 12,6%, ұрлық-қарлық 20,1%, тонау 39,7% кеміп отыр.

Аталған деректер облыс деңгейінде ептеп оң өзгеріс бар екенін айғақтайды. Ал Қосшы қаласында тұрғындар тарапынан тек ішімдікпен байланысты құқықбұзушылықтар мәселесі байқалған. Сондай-ақ ара-тұра үйге ұрлыққа түсу фактісі де тіркеледі. Осылайша, қазір облыс деңгейіндегі орташа тенденция Қосшы қаласының да оң динамикада екенін көрсетіп отыр.

«Сақтықта қорлық жоқ» дегендей, сонда да құрылыс пен инфрақұрылым жаңғырып жатқан қалаға өзге жұрттың жиі келетінін ескерсек, қылмысқа қарсы жүйенің жұмыссыздық, белгісіздік сияқты әлеуетті тәуекелдерге сай икемделуі маңызды. Сондықтан қалалық полиция бөлімдері көшелерде, жолдарда патрульдік қызметті күшейту үстінде. Мысалы, қазір жүргізушілерді алкогольге мас халде ұстауға қатысты акциялар өткізіліп жатыр. Бұл бағытта қоғамның құқық қорғау органдарымен тікелей өзара байланысы аясында учаскелік инспекторларға жан-жақты қолдау көрсетіліп тұрады.

Сондай-ақ Қосшы қалалық прокуратурасы «Тергеушінің көмекшісі AI» атты пилоттық жобаны іске қосып, тергеу жұмыстарын цифрлық құралдар арқылы жеделдетуді қарастырып отыр. Бұл қадам қылмыстың алдын алу мен тергеуге кеткен уақытты қысқартуға бағытталған.

Қазір қалада адам саудасына қарсы арнайы комиссия да жұмыс істеп тұр. Оның аясында құқық қорғау органдары мен үкіметтік емес ұйымдар бірлесіп, ақпараттық білім беру іс-шараларын ұйымдастырады. Мұндай бағдарлама тұрғындарды құқықбұзушылыққа бейім жағдайда болмауға шақырады. Сонымен қатар олардың экономикалық дағдарыс кезінде өз қауіпсіздігі мен құқығын қорғау шараларынан хабардар болғаны маңызды.

«Адам қылмысқа мәжбүрліктен барады» деген сылтауға келсек, ол мәселенің де шешімі бар. Қосшы қаласы бойынша қазір әлеуметтік жағдайы нашар отбасыларға, жастарға, еңбекке жарамсыз азаматтарға көмек көрсету мақсатында әлеуметтік көмек көрсетудің тәртібі бекітілген. Себебі шынымен де сол әлеуметтік қолдауы төмен адамдардың құқықбұзушылыққа көбірек бейім болуы ықтимал. Сол үшін осындай профилактикалық шаралардың өтіп тұрғаны артықтық етпейді.

Енді Қосшы қаласында қылмыстың пайда болуына ықпал ететін факторлар жиынтығын былайша қарап көруге болады:

Біріншіден, жұмыссыздық және уақытша жұмыспен қамтылу. Қала құрылыс аймағы ретінде белсенді, бірақ тұрақты жұмыс орнын таппаған немесе әлеуметтік қамтамасыздандыруы шектеулі адамдар үшін тәуекел күшейеді.

Екіншіден, миграция, жаңа аудандардың құрылуы, қоғамның қатпарлы құрылымының қалыптасуы біраз уақыт алады. Осындай жағдайларда бақылау, инфрақұрылымның кешігуі, карантиндік немесе әлеуметтік қызметтер тапшылығының көрінуі мүмкін.

Үшіншіден, жасөспірімдер мен жастардың бос уақыты көп болса, олардың бұзақылық, ішімдікке тәуелділік және құқықбұзушылыққа бағыт алуы ықтимал.

Төртіншіден, тәртіптік-құқықтық мәдениет пен қоғамдық белсенділіктің төмен болуы. Тұрғындардың құқық қорғау органдарымен қарым-қатынасы, құқықтық сауатының төмендігі профилактика жұмысының нәтижелілігін төмендетуге әкеп соғуы мүмкін.

Ондайға жол бермес үшін қалада жастарға арналған қоғамдық кеңістік, спорттық-мәдени орталық ашылып, жұрттың оған қатысу белсенділігін арттыру жұмыстары қолға алынған. Жұмыссыздық мәселесін төмендету мақсатында жергілікті бизнес пен кәсіпкерлікті қолдау, құрылыс саласында жұмыс істеуді тұрақты ету ісі де қарастырылған. Басқа жақтан қоныс аударып келген тұрғындарды интеграциялау бағытында мектеп, мәдениет үйлері, қоғамдық қабылдау қызметтері күшейтіле түсті.

Сондай-ақ патруль мен бақылау қызметін қаланың өсіп келе жатқан аудандарына жиі бағыттап тұрған дұрыс. Өйткені ескі және жаңа аймақтарда құқықбұзушылық деңгейі әртүрлі болуы мүмкін.

Одан бөлек, қоғаммен тығыз байланыс орнатып, тұрғындардың құқықбұзушылықтарды дереу хабарлау мәдениетін қалыптастыру қажет. Бұл үшін жергілікті ақпараттық науқандар жиі жүргізіліп тұруға тиіс.

Жастарға, аз қамтылған отбасыларға бағытталған әлеуметтік-психологиялық қызметтерді күшейтпесе, тағы болмайды. Білім беру, тренинг, тәлім-тәрбие бағдарламаларын ұйымдастыруды жиілеткен жөн.

Алкоголь мен нашақорлықпен күрес бойынша мониторинг, емдеу және оңалту жолдарын қамтамасыз ету сияқты арнаулы іс-шараларды жиілеткен жөн.

Оған қоса, жергілікті әкімдік, полиция, қоғамдық кеңестер арасында үйлестірілген жұмыс жүйесі бойынша жүргізілген шаралардың нәтижесін кезең-кезеңмен бағалап, кеткен кемшіліктерді уақытында түзетіп отыру керек.

Баса ескерер мәселе, қылмысқа қарсы күрес тек полицияның ғана міндеті емес. Сондықтан ол қоғамдық өмірдің барлық саласын қамтуға тиіс.

Қорыта айтқанда, Қосшы қаласының ұсынылған шараларды толық іске асыру арқылы таза, қауіпсіз ортаға айналуға мүмкіндігі жоғары. Тұрғындардың құқығын қорғап, тыныш орта құруға барша саналы азамат мүдделі деп білеміз.