Щучинск кафесінде жарылыс болып, жеті адам қаза тапты

Ақмола облысы әкімдігінің Instagram парақшасындағы жазбаға сәйкес, Щучинск қаласындағы кафеде жарылыс болып, жеті адам қаза тапты, деп хабарлайды JANABASTAU.KZ ақпарат агенттігі.

Ақмола облысы ТЖД мәліметінше, Бурабай ауданының Щучинск қаласында бес қабатты тұрғын үйге тіркелген бір қабатты кафеде газ-ауа қоспасының жарылысы болып, өрт шыққан.

Хабарлама түскеннен кейін 5 минут ішінде Ақмола облысының ТЖД күштері мен құралдары оқиға орнына келді. Өрт сөндірушілер жанған ғимараттан 8 газ баллонын алып шықты және 10-нан астам адамды құтқарды. Өрт толығымен сөндірілді. Оқиғаның себептері мен жағдайлары анықталуда.

Ақмола облысы ТЖД-де жедел желі телефоны іске қосылды: 8 (7162) 514-298. Оқиға орнына ТЖД басшылығы, облыс әкімінің орынбасары, барлық ТЖД бөлімшелері, соның ішінде өрт сөндіру есептері, құтқару топтары, медициналық қызметтер мен полиция, газ-техникалық инспекция келді.

ТЖМ санавиациясы және жедел медициналық көмек машиналары жоғары дайындыққа алынды.

Әкімдік мәліметінше, барлығы 26 адам зардап шекті, оның ішінде: 7 адам қаза тапты (оның бірі – 16 жастағы қыз). 13 адам Бурабай аудандық ауруханасына жатқызылды. 6 адам амбулаториялық бақылауға жіберілді. 

"Денсаулық сақтау басқармасы тарабынан қосымша медициналық бригадалар жедел түрде жасақталды. Барлық қажетті ресурс жұмылдырылды: мамандар, дәрі-дәрмектер, санитарлық авиация оқиға орнына бағытталды. Оқиға орнында облыстық жедел штаб жұмыс істеуде. Оқиғаның себептері анықталуда. Ақмола облысының әкімдігі қаза тапқандардың отбасыларына және зардап шеккендерге барлық қажетті көмекті көрсетеді", - делінген әкімдік хабарламасында.