Ұлттық ұлан сарбаздарын ұрған: Олимпиада жүлдегері үш жылға сотталып кетті

Павлодарда Ұлттық ұлан қызметкерлеріне қол көтерген спортшы 3 жылға сотталып кетті, деп хабарлайды JANABASTAU.KZ ақпарат агенттігі. 

Еркін күрестен Олимпиада ойындарының қола жүлдегері Дәулет Шабанбайға қатысты іс бойынша сот процесі аяқталды.

Іс материалдарында айыпталушының биыл қыркүйек айында Ұлттық ұланның үш әскери қызметкеріне күш қолданғаны айтылады. Кешкі сағат 21.00 шамасында дәмхана маңында тоқтатқан патрульдердің сұрақтарына балағат сөзбен жауап беріп, күш көрсеткен.

Атап айтқанда, біреуін кеудесінен итерсе, наряд бастығын иығынан қағып жіберген. Ал үшіншісінің көзінен ұрған.

Павлодар қаласындағы қылмыстық істер жөніндегі ауданаралық соты айыпталушыны кінәлі деп танып, оны үш жылға бас бостандығынан айырды. Дәулет Шабанбай жазасын орта қауіпсіздікке ие мекемеде өтейтін болады.