"Жаһандық бейбітшілікке қатер төнді": БҰҰ АҚШ-тың Иранға жасаған шабуылын айыптады

АҚШ пен Иран арасындағы шиеленіс әлем назарын қайтадан Таяу Шығысқа бұрды. Бұл жолы Біріккен Ұлттар Ұйымы тікелей үн қатып, жағдайдың ушығуына алаңдаушылық білдірді, деп хабарлайды janabastau.kz.

БҰҰ Бас хатшысы Антониу Гутерриш Америка Құрама Штаттарының Иранға жасаған әскери шабуылын қатаң сынға алып, бұл әрекетті "жаһандық бейбітшілік пен тұрақтылыққа тікелей қауіп" деп атады.

"Қақтығыс ушыққан сайын, ең алдымен бейбіт тұрғындар зардап шегеді. Біз қазіргі жағдайдың күрт нашарлауына жол бермеуіміз керек," – деді Гутерриш.

Оның айтуынша, бұл шиеленіс тек аймақтық деңгейде емес, бүкіл әлемге әсер ететін геосаяси салдарға ұласуы мүмкін. Сондықтан БҰҰ тараптарды сабырға шақырып, кезекті рет дипломатиялық жолдарды іздеуге үндеді.

Антониу Гутерриш халықаралық қауымдастық пен әлем елдерін үнсіз қалмауға, жанжалдың шешімін бейбіт және келіссөз арқылы табуға белсенді араласуға шақырды. Бұл — ұлттар мен халықтардың амандығы үшін жаһандық жауапкершілік кезеңі.