Бюрократиядан қолайлылыққа: цифрландыру мемлекеттік қызметтерді қалай жақсартады

2024 жылы Қазақстан Мемлекет басшысының тапсырмасын іске асыруда айтарлықтай нәтижелерге қол жеткізді. Цифрлық трансформацияның нормативтік және әдістемелік негіздері әзірленіп, сараптамалық база қалыптастырылды және әртүрлі салаларда ауқымды реформалар іске қосылды. Бұл туралы ҚР Цифрлық даму, инновациялар және аэроғарыш өнеркәсібі министрлігі хабарлады.

Цифрлық трансформацияның негізгі құралдарының бірі бизнес-процестерді қайта инжинирингтеу болды. 23 мемлекеттік органдағы 1200-ден астам мемлекеттік процесті қайта қарау нәтижесінде 468 бизнес-процесс оңтайландырылып, олардың орындалу мерзімі орта есеппен 45%-ға қысқарды.

Атап айтқанда, Ауыл шаруашылығы министрлігінде 98 процесті қайта қарау қызмет көрсету мерзімін 55%-ға қысқартуға мүмкіндік берді. Ішкі істер министрлігі мен Ұлттық экономика министрлігінде бұл көрсеткіш тиісінше 55% және 85% болды.

Жылдың басты жетістіктерінің бірі – мемлекеттік қызметтерді цифрландыру деңгейінің артуы. БҰҰ мәліметтері бойынша, Қазақстан онлайн-қызметтер индексі бойынша әлемдегі үздік 10 елдің қатарына кіріп, 193 елдің ішінде цифрландыру деңгейі бойынша 24-орынға ие болды.

Бүгінде халықтың 93%-дан астамы eGov порталы арқылы электрондық қызметтерге қол жеткізе алады. Мемлекеттік қызметтердің 90,8%-ы смартфон арқылы қолжетімді. Биометриялық сәйкестендіру мен QR-қолтаңбаларды енгізу электрондық қызметтерді алуды жеңілдетті – қазақстандықтар бір жыл ішінде 23 миллионнан астам құжатты QR-код арқылы растады.

Қазақстандағы цифрлық трансформация мемлекеттік қызметтерді ыңғайлы, қолжетімді және тиімді етуге бағытталған.

Міне, қазақстандықтар үшін нақты пайда әкелген бірнеше цифрлық шешімдер:

• Цифрлық әскери билет қағаз құжаттарды толығымен алмастырды.

• Балабақшаға онлайн қабылдау ваучерлік қаржыландыру жүйесі арқылы процесті ашық етті.

• “Еуропротоколды” енгізу жол-көлік оқиғаларын полицияның қатысуынсыз рәсімдеуге мүмкіндік беріп, сақтандыру төлемдерін алу мерзімін 40 күннен 5 күнге дейін қысқартты.

• Атқарушылық өндірісті автоматтандыру жеке сот орындаушыларының араласуын жойып, азаматтарға қаржылық жүктемені азайтты.

• Цифрландыру балабақшаға, мектептерге, жоғары оқу орындары мен жатақханаларға қабылдауды жеңілдетті, сондай-ақ денсаулық сақтау, әлеуметтік қорғау және тіркеу қызметтерін оңтайландырды.

2025 жылы 44 мемлекеттік қызметтің мерзімін қысқарту, 20 мемлекеттік қызметті проактивті форматқа көшіру, сондай-ақ 35 мемлекеттік қызметті трансформациялау жоспарланған.

Цифрлық трансформацияның нәтижелері бүгінде миллиондаған қазақстандықтар үшін сезілуде. Әрбір жоба мемлекеттік қызметтерді ыңғайлы, ашық және қолжетімді етуге бағытталған. Цифрландыру деңгейінің артуы білім беру, денсаулық сақтау және әлеуметтік қызметтерге қолжетімділікті жақсартады, оларды әділетті және ыңғайлы етеді. Енді көптеген мемлекеттік қызметтер онлайн форматта, кезексіз және артық бюрократиялық рәсімдерсіз қолжетімді.