Экстремизмге қарсы саясат: алдын алу басымдығы

Терроризм мен экстремизмге қарсы күрес қазіргі таңда тек қауіпсіздік мәселесі емес, идеологиялық және әлеуметтік мәселе ретінде қарастырылуда. Себебі радикализмнің тамыры көбіне әлеуметтік теңсіздік, ақпараттық вакуум және білім деңгейінің төмендігімен байланысты, деп хабарлайды JANABASTAU.KZ ақпарат агенттігі.

Қазақстанда бұл бағытта кешенді саясат қалыптасқан деуге болады. Мемлекет тек құқық қорғау шараларымен шектелмей, алдын алу жұмыстарына басымдық беріп жатыр. Ақпараттық-түсіндіру топтары, теологтар мен сарапшылар халықпен тікелей жұмыс істеп келеді.

Сарапшылардың пікірінше, радикалды идеологияға қарсы күресте ең әлсіз буын – ақпаратты талдай алмау. Яғни, медиасауаттылықтың төмендігі. Бұл, әсіресе, жастар арасында өзекті. Сондықтан білім беру жүйесінде бұл бағытты күшейту стратегиялық маңызы бар қадам болса керек.

Сонымен қатар діни сауаттылық мәселесі де маңызды. Дінді үстірт түсіну немесе жалған ақпаратқа сену – радикализмге апаратын факторлардың бірі. Осы тұрғыда ресми діни институттардың рөлі артып отыр.

Жалпы алғанда, терроризм мен экстремизмге қарсы күрес тек құқықтық шаралармен шектелмеуі тиіс. Бұл – ұзақ мерзімді, кешенді жұмыс. Ал радикалды идеологияға қарсы иммунитет – сол жұмыстың ең басты нәтижесі болуы керек.