«Мәліктің рухы халықпен» танымдық-тағылымдық экспедициясы ұйымдастырылды

Көкшетау қаласындағы Мәлік Ғабдуллин музейінің ғылыми қызметкерлері Алматы қаласына іс-сапармен барып, «Мәліктің рухы халықпен» танымдық-тағылымдық экспедициясын өткізді. Іс-сапардың алғашқы күні экспедиция мүшелері М.Ғабдуллиннің өмірі мен шығармашылығын, қос батырдың ерлік жолы мен достық қарым-қатынасын жас ұрпаққа үлгі ету мақсатында Бауыржан Момышұлы атындағы «Жас Ұлан» республикалық мектебінде «Ағалы-інілі қос батыр, қияметтік дос батыр» атты кеш өткізді. Топ мүшелерін «Жас Ұлан» республикалық мектебінің басшысы подполковник Нұрлыхан Сатбайұлы  жылы қарсы алды. Сондай-ақ мектеп клубының басшысы Қажымұқан Мағазбекұлы мектептің тыныс-тіршілігі, Бауыржан Момышұлының тұлғасы дәріптелетін мектеп мұражайымен таныстырды. Кеш барысында М.Ғабдуллиннің өнегелі өмір жолынан сыр шертетін «Ғажайып өмір баспалдақтары» атты жылжымалы көрме таныстырылып,  «Мәлік Ғабдуллин мен Бауыржан Момышұлы арасындағы рухани байланыс кезеңдері» тақырыбында дәріс оқылды. Көпшілік қауымға Мәлік батырдың «Қазақ баласы» қолжазбасы туралы баяндалды. Осылайша Көкшетаудағы Мәлік батыр музейінде «Жұлдызсыз батыр» атанған Бауыржанның тұлғасы қалай насихатталса, бүгін Алматының төрінде қос батырдың ерлігі мен достығын теңдей насихаттаудың сәті түсті. Республикалық мектептің түлектері Бауыржан Момышұлының да тұлғалық образын көтеріп жүрген музей қызметкерлерінің еңбектеріне көздері қуанып, көңілдері сүйсінді. Іс-шара соңында мектеп мұражайына естелік сыйлықтар табысталды. Мектеп ұжымы Бауыржан Момышұлының да тұлғалық образын көтеріп жүрген музей қызметкерлерінің еңбегіне ризашылықтарын білдірді.