«+ Qala» қойылымы қосшылық тұрғындардың «құпиясын» ашып тастады

Қосшы қаласындағы Қоғамдық мәдени-спорт кешенінде жас қаламгер, драматург, мемлекеттік «Дарын» жастар сыйлығының иегері Бақытбек Қадырдың «+ Qala» атты лирикалық комедиясының премьерасы өтті. Қоюшы режиссері – Жұлдызбек Жұманбай, деп хабарлайды JANABASTAU.KZ ақпарат агенттігі. 

Қойылымға қала әкімінің орынбасары Берген Жұмкейұлы,  Ішкі саясат, мәдениет, тілдерді дамыту және спорт бөлімінің басшысы Айнагүл Көңбайқызы, жазушы-драматур Роза Мұқанова, Көкшетаудағы Шахмет Құсайынов атындағы Ақмола облыстық қазақ музыкалық-драма театрының директоры, белгілі актер Жарас Қалдаров, сол театрдың көркемдік жетекшісі, ақын-драматург Манарбек Қыдырбайұлы, сондай-ақ ақындар Бауыржан Қарағызұлы, Файзолла Төлтай, Ұмтыл Зарыққан, Олжас Қасым арнайы келіп қатысты.

Премьера басталмай тұрып қала әкімінің орынбасары сөз сөйлеп, театр әртістеріне сәттілік тіледі.

Қалада алғаш рет сахналанған «+ Qala» лирикалық комедиясы Қосшы қаласының құрылуы мен тұрғындарының ментальдық ерекшеліктерін суреттейді. Туындыда әр өңірден келген адамдардың көршілік қарым-қатынасы, урбанизация әсерінен адами байланыстардың үзілуі, кейін күтпеген оқиға нәтижесінде олардың бірігіп, шынайы достық пен түсіністік орнатуы көркем тілмен, шеберлікпен бейнеленген. Шығармада береке-бірлік пен тату көршіліктің қадірі айрықша көрсетіледі.

Бұл ретте қойылымның атауындағы «+» белгісі Қосшы қаласының тұрғындарға жақсылық пен жағымды энергия қосатын орта екенін білдіретінін айта кеткен жөн.

Қосшылық көрермендерге ерекше әсер сыйлаған қойылымға адам көп жиналды.

Комедияда басты рөлдерді сомдаған актерлер өз кейіпкерлерінің бейнелерін шеберлікпен сомдап шықты.

Қойылымнан ерекше әсер алған драматург Роза Мұқанова өзінің әлеуметтік желідегі парақшасында «+Qala» лирикалық комедиясы жөнінде пікірін жариялаған.

Бақытбек Қадырдың «+Qala» лирикалық комедиясын Қосшы көрермені ерекше қызығушылықпен қабылдады. Әдебиет, театр, кино – өнердің АТАСЫ! Театр – адамдар арасындағы мәдени қарым-қатынастың биік үлгісі, өнегесі. Театр – ұлттың жаны, театр – ұлттың тілі, театр – ұлттың өзі!

Өнер мен ғылым – егіз ұғым. Екеуінің еңсесі – қазақтың еңсесі. Кешегі қойылымды көріп отырып, театр труппасын жасақтап үлгерген Қосшы әкімдігіне, өнер мен мәдениетке жанын салып, мемлекет саясатын құлшына жүргізіп отырған Айнагүл Көңбайқызының іскерлігіне риза болдым. Қазақ қыздары жеке басының қызығынан гөрі ұлттың мүддесіне дәл осылай еңбек етіп жатқандары сүйсінтті. Мен олардың өзіне емес, ХАЛЫҚҚА қызмет жасай алатындығын, Президенттің ой-арманын іске асыра алатындығын көрдім! Шәкірттерім де, өзім де кеш қарайтып қайтсақ та, көңіл ағарып, шаттанып қайттық! Рахмет сіздерге, ұлттың белсенді жастары! – деп жазды жазушы.