Қосшы қаласында көше жарығын жаңарту жұмыстары жалғасып жатыр

Қосшы қаласында көше жарығын жақсарту бағытында ауқымды жұмыстар жүріп жатыр, деп хабарлайды JANABASTAU.KZ ақпарат агенттігі.

Бұл туралы Қосшы қаласы әкімінің баспасөз қызметі мәлім етті.

Жыл ішінде ондаған көше жарықтандырылып, жаңа шамдар орнатылды, бұрын істен шыққан бөліктері қалпына келтірілді.

Ең ірі жобалардың бірі – Қосшы қаласынан Тайтөбе ауылына дейінгі жолды жарықтандыру. Бұл бағыттың қауіпсіздігі айтарлықтай артты. Сондай-ақ Амансүгіров көшесінде, №1 мектепке дейін жаңа шамдар толық орнатылды. Алтын Қызық көшесінде де жарық жүргізіліп, Абайдан Республика көшесіне дейінгі аралыққа қуаты 150 ватттық заманауи шамдар қойылды.

Республика көшесінде 200 ватт шамдар орнатылып, жарықтың бұзылған жерлері жөнделді. Бұл көшедегі жұмыстар әлі де жалғасып жатыр. Абай көшесінде де дәл осындай қуатты жаңа шамдар қойылып, кабельдер жөнделіп, ақаулар қалпына келтірілуде.

Арқалық көшесінде жаңа шамдар орнатылып, кабельдік желілер жаңартылды. Солтүстік квартал ықшамауданында көше жарығы толық қамтамасыз етілді. 19–20 ықшамаудандарында да жарық шамдары ішінара орнатылды. Биыл тұрғындардан түскен 100-ден астам өтініш (шам ауыстыру, жаңа шам қою мәселелері) орындалды.

Жалпы, бір жылда 50-ден астам көше жарықтандырылды.

Апаттардың алдын алу үшін РП және қосалқы станция нысандарында техникалық жұмыстар жүргізілді. Электр желілеріндегі жүктемені азайту мақсатында РП-2 қосымша нысаны іске қосылды.

Жалпы, атқарылған жұмыстар Қосшы қаласының инфрақұрылымын жақсартуға, тұрғындардың қауіпсіздігі мен өмір сапасын арттыруға бағытталған.