Құрмет Сақайұлы атындағы музыка зертханасы ашылды

Заман талабына сай, жаңа 3D форматта жабдықталған аудиторияда ұлағатты ұстаздардың және композитордың дара жолын жалғастырып еңбек етіп жүрген ұстаздардың әдістемелік құралдары жинақталған мультимедиялық тақта орналастырылған. Сондай-ақ Құрмет Сақайұлының гармония және теория пәндерінен көмекші құралы, музыка теориясы пәнінен тест жинағы және т.б. әдістемелік құралдар ұсынылған. Сонымен қатар Құрмет Сақайұлы әнін, Төлеген Қажыбай сөзін жазған «Ақ ордасы білімнің» атты колледж студенттерінің әнұранынан басталып, 30 жылдан астам жеткіншек буынды өнер саласына баулыған ұстаздардың өмірбаяндары, шығаршылығы туралы мағлұмат беретін QR-код орналастырылған әдістемелік ақпарат бұрышы бар. Онда композитордың балаларға арнап жазылған «Күміс қоңырау», «Ақ ордасы білімнің» және «Үш бақытым» хоры мен жеке дауысқа арналған әндер топтамасы жинақталған. Іс-шарада ҚР Педагогикалық Ғылымдар Академиясының академигі, ҚР еңбек сіңірген ұстазы, колледж директоры Ахат Нұртас Ахатұлы Құрмет Сақайұлының колледждің дамуына қосқан өзіндік үлесі зор екенін айтты.