Өскелең ұрпақты биік мұраттарға жетелейтін білім ордасы

– Қаламыздағы заман талабына сай ашылған зәулім мектептердің бірі ретінде құрылысындағы ерекшелігіне тоқталып өтсеңіз... – 1 500 орындық мектеп-гимназия «Accent Development Solutions» ЖШС жеке инвестициялар есебінен салынды. Мердігер – «Bazis Construction» Болат Өтемұратов қоры. 2023 жылдың қыркүйек айынан бастап, құрылыс-монтаж жұмыстары аяқталып, нысан пайдалануға берілді. Мектептің алаңы 17,5 мың шаршы метр, 3 қабаттан тұрады. Сметалық құны 7,6 млрд теңгені құрайды. Нысан құрылысы 2022 жылы басталып, 2023 жылы тамызда аяқталып, пайдалануға берілді. Мектебіміз заман талабына сай жасақталған. Мұнда 4 жеделсаты бар. Барлық 54 оқу кабинеттері қажетті компьютерлік жабдықтармен жабдықталған, 360 орындық асхана, 280 орындық акт залы, 2 спорт залы, жаңа модификациялық үлгідегі 4 информатика, 3 химия, 2 физика, 2 биология, 4 технология кабинеті, музыкалық аспаптар кабинеті, буфет, кітапхана, 3 кітап қоймасы бар. Сондай-ақ гимназияда қыш шеберханасы, фотостудия, робототехника, мобилография, жүргізуді виртуалды оқытуға арналған бөлмелер арнайы жабдықталған. Оқу кабинеттері санитарлық-эпидемиялық талаптарға сәйкес мектеп жиһаздарымен толықтырылған. Мектеп аумағы қоршалған, аумағында ойын алаңдары, футбол және баскетбол алаңы бар.  – Мектептің білім-тәрбие ісі жөнінде кеңінен айтып берсеңіз. Не нәрсеге баса назар аударасыздар? – Жаңа оқу жылынан бастап 2023-2025 жылдарға арналған «Біртұтас тәрбие» бағдарламасы іске асырылуда. Бұл құжат жалпы адамзаттық және ұлттық құндылықтар негізінде өскелең ұрпақты тәрбиелеу сапасын арттыруға бағытталған. Тәрбие – ұрпақты биік мұратқа жетелейтін сапалы білімнің тұғыры. Ұлттық құндылықтармен сусындап өскен ұрпақ ұлағатты болмақ. Дәл осы өскелең ұрпағымыз ұлттың сапасын құрайды. Сондықтан да қадір-қасиет, ар-намыс, адалдық, патриотизм, жауапкершілік, әдептілік, мейірімділік, сүйіспеншілік, үлкенге ізет, кішіге құрмет сияқты қасиеттерге ие шығармашыл азаматты тәрбиелеу маңызды. Міне, сондықтан Ұлттық құрылтайдың отырысында Мемлекет басшысы білім беру саласына қатысты бірқатар негізгі міндеттерге тоқталған болатын. «Ұлттық тәрбие – ел болашағы» тәрбиесінің тұжырымдамалық негіздері енгізіліп жатыр. Тұлғаның жалпымәдени мінез-құлық дағдыларын қалыптастыру, тұлғаның өнердегі және болмыстағы эстетикалық нысандарды қабылдау, меңгеру және бағалау әзірлігін дамыту мақсатында Қазақстан Республикасында білім беруді кешенді жүзеге асыру үшін мектебімізде тегін «Волейбол», «Баскетбол», «Шахмат», «Тоғызқұмалақ», «Бес тас», «Асық ату» «Жүргізуді виртуалды оқыту», «Кербез би» үйірмесі, «Бәйтерек» хор үйірмесі, «Focus» мобилография курсы, «Сарыарқа» домбыра үйірмесі, «Барыс» дебат клубы, Робототехника үйірмелері мен секциялар жұмыс жасайды. Әр секция, үйірмелер толық оқушымен қамтылған. Мектепте оқушылардың бос уақытын ұйымдастыру үшін барынша қолайлы жағдайлар жасалған деп айтуға болады. Білім басқармасымен келісіп, биылғы оқу жылында гимназиялық құрамдас бөлікті ескере отырып, арнайы бағдарлама бойынша оқитын 1-4-сыныпқа дейін бастауыш мектепте ғана гимназиялық сыныптар ашу туралы шешім қабылданды. Бастауыш сыныпта 46 сынып-жиынтықтар, оның ішінде гимназиялық сынып саны – 21 (1 113 оқушы). Олардың ішінде қазақ тілінде оқытатын 32 сынып (778 бала), орыс тілінде оқытатын 14 сынып (335 бала). Орта сыныптарда 5-9 сыныптар 54 сынып-жиынтық (1 286 оқушы) оның ішінде қазақ тілінде оқытатын 33 сынып, орыс тілінде оқытатын 21 сынып . Жоғары сыныптарда 10-11 сыныптар 9 сынып-жиынтықтар. Оқу саны – 206. Олардың ішінде: 5 сынып – қазақ тілінде оқытатын жиынтықтар 124, 4 орыс тілінде – 82. Барлық сынып-жиынтықтар саны – 109, оқушылар – 2 609. Қазіргі уақытта мектеп-гимназияда педагог-зерттеуші саны – 30, педагог-сарапшы саны – 33, педагог-модератор саны – 66-ны құрап отыр. Гимназияға кіре берісте турникеттер орнатылған, олар арқылы өту бет детерминанты (FaseID) арқылы жүзеге асырылады. Ол үшін мектеп оқушылары мен қызметкерлерінің деректер базасы құрылады. Алдын ала жұмыстар басталды. Мектеп жоғары технологиялық жабдықтармен жабдықталған. – Ұстаздардың білімін жетілдіру бағытында қандай жұмыстар жүргізіліп жатыр? – Ұжымда педагогика саласында еңбек еткен ұстаздар, дегенмен дайындығымыз әртүрлі және әр қилы бағытта болды. Мектеп -гимназиясында ұжымдастыру бір миссияда жұмыла жұмыс жасауға бағытталған тренинг, коучинг, оқыту семинарлары жиі ұйымдастырудамыз. Қай елдің болмасын болашағы өскелең жастарға байланысты екені даусыз. Ал жастардың болашағы сапалы білім беретін ұстаздың қанжығасында. Сондықтан білімнің сапалы түрде берілуі білімді ұрпақ үшін өте маңызды. Қазіргі таңда білімді беру саясатында өзгерістер бар, білім беруді үйрету оны қайта сұрау әрекетіміз өзгеруде, білімді қалай, қайдан алуға болады деген сұрақ жауап алу үшін алдымызға келген білім алушыларды дұрыс бағыттап отыру үшін зерттеу саласы қарқын алуда. Іс -әрекеттегі зерттеу (Action Research), сабақты зерттеу (Lesson Stud) тәсілдері арқылы сабақ беруге оқу семинарлары өз нәтижесін беруде. Білім алушыларға жайлы ортаны қалыптастыра отырып белсенді оқыту тәсілдерін қолдану, білім алушы оқу іс - әрекеті үдерісінде кері байланыс беріп, рефлексия жасауға, академиялық адалдыққа баулу басшылыққа алынады. BINOM SCHOOL желісі педагогтерінің кәсіби дамуы аясында MentorEd International Pte Ltd директоры Лилия Мұхаметшинамен әдістемелік коучинг өтті. Сондай-ақ «Кәсіби даму жоспарын құру», «Белсенді оқыту әдістері», «Китериалды бағалау», «Lesson Stud» сияқты оқу курстарын Баянғали Ғалымжанұлы - Евразия гуманитарлық институтының аға оқытушысы, ҚР білім беру ісінің құрметті қызметкері докторант, тренері әр жұма күндері үздіксіз қолдау жасап, жүргізіп келеді. Бұл біздің біліміміздің жетілуіне үлкен серпілдіс әкелді деп айтуға болады. – Ата-анамен байланыс жұмыстарын қалай жүргізесіздер? – Мектебіміздегі 2023-2024 оқу жылы тәрбие жұмысы келесідей 3 құндылықпен тәрбие жұмысын жүргізіп келеді. Ол құндылықтың негізгі бағыттары – ар-ұят, талап, ұлттық мүдде. Осы негізде «Тоғыз ай – 9 іс-шара», «4 тоқсан – 4 өнер», «Оқуға құштар мектеп», «Жүз ән», «Аптаның 5 күні 5 тақырып» сынды жоба жұмыстары кіріктірілген 3 құндылыққа шоғырланған жоспарлы жұмыстар жүргізілуде. Ал ата-аналар қауымдастығымен өзара іс-қимылы негізінде тәрбие міндеттерін іске асыру мақсатында мектебімізде «Ата-аналарды педагогикалық қолдау орталығы», «Даналық мектебі», «Әкелер мектебі», «Аналар клубы» құрылған. Білім беру ұйымдарындағы тәрбие мен оқытуда жалпыадамзаттық және ұлттық құндылықтар негізінде білім алушылардың бойында адами қасиеттерді қалыптастыруға басымдық береді. Сондықтан білім берумен қатар оқушыларды тәрбиелеу, құқықбұзушылықтың алдын алу маңызды. Осы бағытта ата-аналармен бірлесіп оңтайлы нәтижеге жетеміз деген үміт басым. Мектебіміздің әрбір іс-шарасына бір кісідей атсалысып, қолынан келгенше көмек беріп, баланың болашағы үшін бірлесе жұмыс жасауға әзір тұрар ата-аналардың бар екендігі қуантады. Бұл әр баланың болашағы үшін өте маңызды қадам. – Оқу жылының алғашқы екі тоқсанында жеткен жетістіктеріңізбен бөлісе отырсаңыз?

– Жаңа оқу жылы, жаңа білім ордасына көз тігіп, назар аударып, біліміміз бен біліктілігімізді сараптай қарап отырған қырағы көзді мамандар баршылық. Бірақ қандай сынақ, қандай дода болсын «ұстазы жақсының ұстамы жақсы» деген бастамамен алдыңғы қатардан көрінген шәкірттеріміз аз емес. «Менің Отаныма – менің бастамам» Республикалық шығармашылық жоба байқауы, облыстық кезеңінен 10 Ә сынып білім алушысы Қарақат Бердібек жүлделі ІІІ орын алып, бізді бір қуантып тастады. Жеңісте жетекшісі тарих пәнінің мұғалімі Айнұр Ержанқызының да еңбегі зор. Бұдан бөлек Көкшетау қаласында Ақмола облысы білім басқармасының ұйымдастыруымен «Отбасымның байлығы – тілдік капитал» атты қазақ, орыс, ағылшын тілдерін меңгерген отбасылар арасында өткізілген облыстық байқауда Тасболатовтар отбасы жүлделі І орынға ие болды. Жеңімпаз отбасына жүлде қоры 200 мың теңгені құрайтын «МЕЧТА» дүкендеріне тауар сертификаты берілді. «Төрт тоқсан – төрт өнер» жобасы аясында қалалық айтыста 10 Б сынып оқушысы Арайлым Тұралы ІІІ орынды қанжығасына байлап қайтты. Ыбырай Алтынсарин атындағы Бином мектеп-лицейінің 1 жылдығына орай ұйымдастырылған ұлдар арасында волейболдан қалалық турнирде жүлделі І орынды Қосшы мектеп-гимназиясы иеленгендігін мақтанышпен айта аламыз. Бұдан бөлек «Қосшы – мақтанышым» атты қалалық флешмобта мектебіміз І орын тұғырынан көрінді. Ал Қосшы қаласы әкімі кубогы үшін қалалық Жайдарман ойынында мектебіміз І орын жүлдесіне ие болды. Аталған жетістіктер әзірге тек бастамасы деп сенеміз. Білім мен спорт додасында шәкірттеріміз әлі де биіктен көрінеріне сеніммен қараймын. – Әңгімеңізге рақмет, білім саласындағы еңбегіңіз жемісті болсын! Сұхбаттасқан

Гүлназ БИСЕН