Қосшыда көлік астында қалған екі жасар бала көз жұмды

Қосшы қаласында KIA Sportage көлігінің жүргізушісі екі жасар қыз баланы қағып кетіп, сәби оқиға орнында қаза тапты, деп хабарлайды JANABASTAU.KZ ақпарат агенттігі.

Оқиға 2025 жылдың 5 сәуірі күні тұрғын үйлердің бірінің ауласында болған. Алдын ала мәлімет бойынша, көлік тізгініндегі әйел адам кері бұрылу маневрін жасаған сәтте, жолда жалғыз қалған баланы байқамай, қағып кеткен.

Оқиғаның видеосы әлеуметтік желілерде тарап кетті. Кадрлардан бірнеше баланың аулада ойнап жүргенін көруге болады. Бір сәтте бәрі жан-жаққа қашады, ал 2023 жылы туған қыз бала жол үстінде жалғыз қалады. Дәл сол кезде көлік келіп, баланы қағып кетеді.

Желі қолданушыларының айтуынша, көлік жүргізушісі сол аумақта тұрады және шамамен сағат 15:30-да кәмелетке толмаған ұлын іздеп үйден шыққан.

Аталған факті бойынша Қылмыстық кодекстің тиісті бабымен іс қозғалды. Қазіргі уақытта тергеу амалдары жүргізіліп жатыр. Ақмола облысы полиция департаменті бұл ақпаратты растады.

«5 сәуір күні Қосшы қаласындағы тұрғын үй ауласында KIA Sportage көлігін басқарған жүргізуші 2023 жылы туған қыз баланы қағып кетті. Салдарынан бала оқиға орнында көз жұмды. Аталған дерек бойынша қылмыстық іс қозғалып, тергеу амалдары басталды»,– делінген ресми хабарламада.