Әнуарбек Сағитов бүгінгі саясатты қолдайды

29.08.23 сағат 11:14 Сұхбат

3030

Елдің қамын ер ойлар. Шаһарымызда елге сүйеу болар нар тұлғалар жоқ емес, бар. Бақ та, абырой мен құрмет те, барлығы таза маңдай термен келеді. «Еңбегімен ер сыйлы» демекші, ғұмыры еңбекпен өріліп, қажырлы жұмысымен елге пайдасын тигізген азаматтардың бірі – Әнуарбек Сағитов. Әнуарбек Мамырұлы 1948 жылы 19 мамырда Омбы облысы Азов ауданы Чунай ауылында дүниеге келген. Әкесі – соғыс және еңбек ардагері Мамыр Сағитұлы орта мектептің директоры, ал анасы Диляра Абдоллақызы мұғалім болып жұмыс істеген. 1966 жылы мектеп бітірген жас жігіт Омбының ауыл шаруашылығы институтына түседі. Сол кезде-ақ оқуда озат, студенттік кеңестің төрағасы болды, тіпті екінші курста партияға өткен екен. Оқуын аяқтағаннан кейін Әнуарбек Қазақстанға жолдама алады. Қызыл ту совхозында төрт жыл бас маман болып жұмыс істеді.

– Тәжірибелі де, білікті, білімді, өз ісінің шебері болған Галина Вернадская деген кісі мені көп нәрсеге үйретті, бар білгенімен бөлісті. Ұзақ жылдар бойы шаруашылықты басқарды. Әлі күнге дейін алғысым шексіз. Кейін №47 ат зауытының директоры болып қызмет атқарып жүргенімде КСРО Ауыл шаруашылығы министрлігіне тікелей есеп беретінмін. Мен істеген жылдары екі жаңа сүт кешені, жемшөп өңдейтін зауыт, омарта салынды. Ең бастысы, бізде Қазақстанның ғана емес, бүкіл Одақтың алтын қорына айналған асыл тұқымды жылқылары болды. Ұзын сөздің қысқасы, көп жұмыс атқардық. Нәтижесінде шаруашылығымыз бірінші орынға шықты, мен «Еңбек Қызыл Ту» орденімен марапатталдым. Содан партияның облыстық комитетінің бірінші хатшысы еңбегімді бағалап, маған бір ауданды атап, «аудандық атқару комитетінің төрағасы болып барасыз» деді. Мен «бармаймын, осында істеймін» деп келіспедім. Үш-төрт айдан кейін қайта шақырып алып, совхоздың директорынан мені Рузай ауданының бірінші хатшысы қылып тағайындады. Одан соң әкімдердің ротациясын жасап, мені Есіл ауданына жіберді, Анатолий Смирнов деген облыс әкімінің орынбасары да болдым. Ол маған «Сізге көңілім түсті, Ғабит Мүсірепов ауданына барасыз» деді. Аудан 466 мың гектер бидай егетін. Уақыт өте келе Көкшетауға Табиғи ресурстар басқармасының директоры болып ауыстым, сол жақтан зейнеткерлікке шықтым, – дейді Әнуарбек Сағитов.

Бұрынғы және қазіргі мемлекеттік саясаттың айырмашылығы неде? Ел азаматы деген атаққа кір келтірмей, еңбектің үлгісін көрсеткен Әнуарбек Мамырұлының айтуынша, райкомпартияның бірінші хатшысында бүкіл билік болатын, ол аудан көлемінде күллі мәселені шешетін. Ол заманның да, ол дәуірдің де жақсы жақтары бар шығар, бірақ еңбек ардагері ретінде «бүгінгі саясатты, нарықтық экономиканы қолдаймын» дейді.

– «Еңбек етсең ерінбей, тояды қарның тіленбей» деп, дана халқымыз тегін айтып отырған жоқ. Орысша айтқанда, баяғы Совет үкіметі кезінде «один был сошкой, а семеро вокруг него были с ложками». Ашығын айтқанда, көп адам жұмыс істеген жоқ. Әрқайсының үйіне барып: «Әй, жұмысқа неге шықпайсың, жұмыс істеу керек қой, саған күнкөріс керек қой» деп үгіттейтінбіз. Үнемі кадр тапшылығы болатын. Қазіргі заманда демократия, бостандық бар. Жұмыс істегің келсе, істе, тап, әлеуметтік тұрмысыңды жақсартып, жақсы үй саламын десең, жұмыс істеп сал. Жаңа машина мінемін десең, мін. Демаламын, шетелге шығамын десең, шық, барып кел. Бәріне де рұқсат бар ғой. Ал Совет үкіметі кезінде ондай болған жоқ. Халық бақылаушысы деген болатын. Қазіргі заманда 5 теңгенің нәрсесін 10 теңгеге сатса, ол – кәсіпкер, ал бұрын оларды «спикулянт» дейтін, – деген естелігімен бөліскен Әнуарбек Мамырұлы сыбайлас жемқорлық жайлы да сөз қозғады.

Ел дамуына жанашыр жандардың сүбелі үлес қосатынына сенім артатын кейіпкеріміздің ойынша, егер де бұл мәселе шешілетін болса, халықтың, үкіметтің тұрмысы әлде де жақсарады. Кезінде мұндай ұғым мүлдем болмаған көрінеді.

– Жалпы, адам баласын мектепте, отбасында «біреудікін алма, біреудікін ұрлама, адал жұмыс істе» деп үйретіп отыру керек. Екіншіден, сот жүйесі Ата заңымыз бойынша халықты соған үйретуі керек. Кезінде аудан басқару үшін, ең алдымен, маман, содан кейін басқарма басшысы болуы керек еді, кейін ғана райисполком төрағасы лауазымына тағайындауы мүмкін, – дейді Құрметті Еңбек ардагері Әнуарбек Сағитов.

Қаламызға осыдан тоғыз жыл бұрын көшіп келген жерлесіміз өңіріміздің дамып келе жатқанын атап өтті. «Сол кездегі және қазіргі Қосшының айырмашылығы жер мен көктей дейді. Бүгінде ұлын – ұяға, қызын – қияға қондырған отағасы жан жары Раиса Құдайбергенқызымен немерелерінің қызығын көріп, бақытты ғұмыр кешуде. Елге еңбегі сіңген осындай тұлғаларды кейінгі толқын білуі тиіс. Артында ердің еңбегін бағалайтын елі барда, ізін жалғастыратын ұрпағы барда «Жақсының аты өшпейді» деген осы болар.

Жанар АХМЕТОВА